काठमाडौं– कोरोना महामारीको समयमा स्वास्थ्य सामग्रीलगायत सहयोग गर्ने संघसंस्था तथा व्यक्तिहरूलाई कतारमा रहेको नेपाली दूताबासले सम्मान गरेको छ । कोभिडको समयमा नेपाललाई भेन्टिलेटरलगायत सामग्री पठाउन सहयोग गर्नेहरूलाई दूताबासले सम्मान गरेको हो ।
नेपालमा स्वास्थ्य सामग्री पठाउनका लागि नेपाल बिजनेस एसोसिएसन कतारका अध्यक्ष महेन्द्रप्रसाद चौलागाईंको संयोजकत्वममा समिति गठन गरेर स्वास्थ्य सामग्री संकलन गरिएको थियो । कार्यक्रमा सहयोग पु¥याउने नासेर अल अली इन्टरप्राइजेजका अध्यक्ष नासेर अल अली, सफारी कम्पनीहरूको समूह एच.आर म्यानेजर अनुप थुलसिधरन र नेपाल बिजनेस एसोसिएसन कतारका अध्यक्ष महेन्द्र प्रसाईंलगायत ४८ जनालाई सम्मान गरिएको दूताबासले जनाएको छ । सो अवसरमा नेपाल इन्जिनियर एसोसिएसन दोहालाई पनि सम्मान गरिएको दूताबासले जारी गरेको सूचनामा उल्लेख गरिएको छ ।
कार्यक्रममा बोल्दै कतारका लागि नेपाली राजदूत डा.नारदनाथ भारद्वाजले आगामी दिनमा पनि यस्तै सहयोग तथा सहकार्य हुने विश्वास व्यक्त गरेको दूताबासले जनाएको छ । कतारबाट कोभिडको महामारीको समयमा रु. १ करोड २० लाख बराबरको स्वास्थ्य सामग्री नेपाल पठाइएको पनि दूताबासले जारी गरेको सूचनामा उल्लेख गरिएको छ । जसमा १४ थान भेन्टिलेटर, ४२ अक्सिजन कन्सन्ट्रेटर, २ हजार १ सय थान पल्स अक्सिमिटर र नेजल क्यानुला ५० थान गरी जम्मा २ हजार २ सय ६ थान स्वास्थ्य सामग्री नेपाल पठाइएको जनाइएको छ । सो सामग्री स्वास्थ्य तथा जनसंख्या मन्त्रालयलाई हस्तान्तरण गरिएको गरिएको बताइएको छ ।
