काठमाडौं– वैदेशिक रोजगारीका लागि कतार जाने नेपालीले अब पिसिआर रिपोर्ट नेगेटिभ भए प्रवेश पाउने भएका छन् । कतार सरकारले त्यहाँ प्रवेशको मापदण्ड संसोधन गर्दै यस्तो नियम ल्याएपछि नेपालीहरू नेगेटिभ पिसिआर रिपोर्ट भए कतार प्रवेश पाउने भएका हुन् ।
यो नियम १२ जुलाई अर्थात २८ असारदेखि लागू हुने भएको छ । जसमा ७२ घन्टाभित्रको पिसिआर परीक्षणको रिपोर्ट देखाएर कतार जान पाइने भएको हो । यसरी जाने नेपालीले १२ घन्टाभित्र अनिवार्य रूपमा एहताराज वेबसाइटमा अनलाइन प्रि रजिस्ट्रेसन भने गराउनु पर्ने छ । यसरी कतार जाने व्यक्तिहरूले क्वारेन्टाइनमा भने अनिवार्य रूपमा बस्नु पर्ने नियम बनाइएको छ ।
त्यस्तै कतारको सूचीमा खतरा कम रहेको देश ‘ग्रिन जोन’ मा पर्ने मुलुकबाट कतार प्रवेश गर्नेले आङ्खनो मुलुकमा १० दिन होटेल क्वारेन्टाइन बसेर कतार प्रवेश गरेको भन्ने प्रमाण पेस गरे मात्र कतार प्रवेशको अनुमति पाउनेछन् । यस्तो अवस्थामा पनि क्वारेन्टाइन भने बस्नु पर्नेछ । नियमअनुसार खोप नलगाएको अवस्थामा ग्रिन जोनबाट गएको भए ५ दिन, एल्लो जोनबाट गएको भए ७ दिन क्वारेनटाइन बस्नुपर्छ ।
त्यस्तै कतारले मान्यता दिएको कोरोनाको खोप लगाएका यात्रुहरूले भने क्वारेन्टाइनमा बस्नु नपर्ने नियम लागू गरेको कतारमा रहेको नेपाली दूताबासले जनाएको छ । त्यस्तै कतारमा कोभिड–१९ संक्रमण पुष्टि भएको तर निको भएको व्यक्तिले भने १२ महिनाभित्र यात्रा गर्दा क्वारोन्टाइन बस्नु नपर्ने भएको छ ।
यस्तै गरी, खोपको मात्रा पूरा नगरेका वा खोप नलगाएका यात्रुको हकमा अनिवार्य रूपमा डिस्कोभर कतार वेबसाइटबाट बुकिङ गरेर १० दिन होटेल क्वारेन्टाइन बस्नु पर्ने नियम लागू हुने भएको छ ।
-1752335779.jpg)
