काठमाडौं– नेपाली श्रमिकले श्रम गन्तव्य मुलुक मलेसिया जानका लागि अर्को वर्षसम्म नै कुर्नु पर्ने अवस्था देखिएको छ । मलेसियामा कोरोना भाइरस (कोभिड–१९) को संक्रमण दर उच्च रहेका कारण त्यहाँ आगामी सन् २०२१ को डिसेम्बरसम्म खुला हुने सम्भावना न्यून नरहेको हो ।
अहिले पनि दैनिक संक्रमितको संख्या बढ्दै गएकाले नेपाली श्रमिक यो वर्ष मलेसिया जान पाउने सम्भावना कम हुँदै गएको मलेसियाका लागि श्रम काउन्सिलर दीपक ढकालले जानकारी दिएका छन् । बुधबार वैदेशिक रोजगार पत्रकार समाजले आयोजना गरेको ‘प्रमुख श्रम गन्तव्य मुलुकह्रूले नेपाली कामदार लिने गरेका नयाँ व्यवस्था विषयक’ भर्चुअल कार्यक्रममा बोल्दै काउन्सिलर ढकालले यस्तो बताएका हुन् । अहिले मलेसियामा दैनिक करिब ७ हजार संक्रमित थपिने गरेको उनको भनाइ छ । मलेसिया सरकारले संक्रमितको संख्या ४ हजारभन्दा कममा सिमित गर्ने लक्ष्य लिएको भए पनि त्यसो हुन नसकेको उनले बताए । अहिले डिसेम्बरसम्म अवस्था नियन्त्रणमा लिने प्रयास गरिएको मलेसिया सरकारले जानकारी दिने गरेको उनको भनाइ छ ।
आफूह्रूले निरन्तर कूटनीतिक पहल गर्दा पनि मलेसिया सरकारले विदेशी कामदार लिने विषयमा कुनै चासो नदिएको उनले बताएका छन् । गत वर्ष मार्चबाट नै मलेसियामा लकडाउन गरिएको र अझै पनि खुकुलो हुने सम्भावना कम रहेको बताइएको छ । कोरोनाका कारण हालसम्म मलेसियामा २१ जना नेपालीले ज्यान गुमाएको ढकालले जानकारी दिए । मलेसियाले खोपलाई प्राथमिकतामा राखेकाले प्राय सबैजसोले खोप लगाउन पाएको अवस्था रहेको पनि बताए ।
‘नेपालमा पनि कोरोना संक्रमित हुनेको संख्या नियन्त्रणमा नदेखिएको र मलेसियामा पनि अवस्था उस्तै छ, आगामी दिनमा कोरोना संक्रमण दरको अवस्था कस्तो हुन्छ, त्यस पछि मात्रै मलेसियाको नेपाली श्रमिकको रोजगारीका विषय भन्न सकिन्छ,’ उनले भने । रोजगारदाताह्रू दूताबासमै पुगेर नेपाली श्रमिक कहिलेबाट लिन सकिन्छ भन्दै जिज्ञासा राख्ने गरेको उनले बताए । यद्यपि अहिले मलेसियाले नेपालसहितका देशबाट श्रमिक लिन बन्देज लगाएको अवस्था रहेकाले यस विषयमा यसै भन्न सकिने अवस्था नरहेको ढकालको भनाइ छ ।
-1745656903.jpeg)