काठमाडौं– वैदेशिक रोजगार व्यवसायी मञ्च नेपाल व्यवसायीका समस्या समाधानका लागि सधैँ तयार भएको बताइएको छ । सोमबार मञ्चले गठन गरेको संख्या ‘सय’ समस्या समाधान कमिटीले आयोजना गरेको पत्रकार सम्मेलनमा बोल्ने मञ्चको नेतृृत्वमा रहेका व्यक्तिहरूले आफूहरू व्यावसायीको हक हितमा सधैँ समर्पित रहेको बताएका हुन् ।
आफूहरुको निरन्तरको प्रयासले सयको संख्यामा सहजता ल्याएर व्यावसायीलाई राहतको महसुस गराउन आफूहरूले सफल भएको मञ्चमा आबद्ध व्यवसायीहरूको भनाइ छ । पत्रकार सम्मेलनमा बोल्दै मञ्चका कार्यबाहक अध्यक्ष राजेन्द्र भण्डारीले निरन्तरको प्रयासपछि यो वर्ष १०० संख्यामा छुट दिलाउन सफल भएको उनले बताएका छन् । संस्था नवीकरण नहुने अवस्थामा पुगेको अवस्थामा पनि मञ्चले निरन्तर लबिङ गरेकाले यसमा सफलता पाइएको भण्डारीले बताए ।
सोही कार्यक्रममा बोल्दै मञ्चका संस्थापक अध्यक्ष सरोज पोखरेलले १०० संख्यामा भएको सहजताको जस लिन होड्बाजी चलेको भन्दै असन्तुष्टि व्यक्त गरेका छन् । यो जस लिने समयभन्दा पनि व्यावसायीका लागि केही राहत मात्रै भएको उनले बताए । आफूहरूले निरन्तरको प्रयासले मात्रै यो सफल भएको उनको भनाइ छ । व्यावसायीलाई तरबार देखाएर तर्साउन खोजिएको भन्दै यस्तो नगर्न उनले सरकारसँग अनुरोध पनि गरेका छन् ।
‘व्यावसाय हो कुनै वर्ष हजार पठाइएला, कुनै वर्ष ५० मात्रै पठाइएला, व्यावसायीलाई निश्चित कामदार पठाउनै पर्ने बाध्य बनाउन हुँदैन,’ उनले भने । व्यवसायी सधैँ एकनासको नहुने भन्दै उतारचढावका बीच व्यावसाय गरिने भएकाले निश्चित संख्याको विषय सदाका लागि अन्त्य गर्नका लागि आफूहरू लागिरहेको उनले बताएका छन् ।
त्यस्तै कार्यक्रममा बोल्दै संख्या सय समस्या समाधान कमिटीका संयोजक हरिबहादुर पाण्डे क्षत्रीले महामारीको विकराल अवस्थामा पनि कमिटीले लगातार काम गरेर सफलता पाएको जानकारी दिएका छन् । ७ सय ३२ वटा म्यानपावर कम्पनी बन्द गर्ने उद्देश्यका साथ ल्याइएको यो व्यवस्था सदाका लागि अन्त्य गर्नु पर्ने उनको भनाइ थियो ।
‘मन्त्रीलाई भेट्ने, ज्ञापनपत्र बुझाउने तथा सामाजिक सञ्जालमा लेखेकै भरमा यो समस्या समाधान भएको होइन, मञ्चले निरन्तर पहल गरेकाले सफलता पाइएको हो,’ उनले भने । केही व्यक्तिलाई बुझाउन नसकेका कारण १ सय संख्याको मापदण्ड आएको भन्दै अब आउने नेतृत्वले यसलाई सधैँका लागि अन्त्य गर्ने गरी लाग्नु पर्ने उनले बताए । अघिल्ला वर्षजस्तै यो वर्ष पनि समस्या समाधान गर्न सफल भए पनि अब सदाका लागि यो समस्या समाधान गर्नु पर्ने उनको भनाइ थियो । समस्या समाधान कमिटीले तयार पारेको प्रतिबेदन मञ्चका कार्यबाहक अध्यक्ष भण्डारीलाई हस्तान्तरण गरिएको थियो ।
-1745656903.jpeg)