काठमाडौं– कोरोनाका कारण रोजगारी गुमाएकाहरूका लागि छुट्टयाएको बजेट फ्रिज भएको छ । श्रम रोजगार तथा सामाजिक ले स्वदेश तथा विदेशमा रोजगारी गुमाएकालाई लक्षित गर्न लागेको सबै सीप र तालिमका कार्यक्रम ४ अर्ब ३४ करोड रुपैयाँ फ्रिज भएको हो ।
कोरोनाका कारण रोजगारी गुमाएका तथा विपन्न परिवारलाई चालु आर्थिक वर्ष ०७७÷७८ मा प्राथमिकतामा पारेर व्यवसायिक सीप तालिम दिने भनिएका सबै कार्यक्रम कोरोनाका कारण प्रभावित भएको श्रम रोजगार तथा सामाजिक सुरक्षा मन्त्रालयका सहसचिव तथा प्रवक्ता दीपक काङ्खलेले जानकारी दिए । सरकारले चालू आर्थिक वर्षमा कम्तिमा ५० हजार जनालाई व्यवसायी तालिम दिएर स्वरोजगार बनाउने उद्देश्यका साथ रकम विनियोजन गरेको थियो । श्रम, रोजगार तथा सामाजिक सुरक्षा मन्त्रालयले चालू आर्थिक वर्षको बजेटमार्फत नै प्राथमिकता दिएर रोजगारी गुमाएका श्रमिकलाई सीप रूपान्तरण गरी उत्पादन, सेवा, हस्तकला, प्लम्बिङ, सिलाइ–कटाइलगायत तालिम दिएर स्वरोजगार बनाउने लक्ष्य लिएको थियो । कोरोनाका कारण ती सबै कार्यक्रमहरू सञ्चालन हुन नसकेको मन्त्रालयले जनाएको छ ।
व्यवसायी सीप र तालिमका कार्यक्रम सञ्चालन कार्ययोजना नै निमार्ण गरी तालिमको तयारी भए पनि कोरोनाले सबै कार्यक्रम प्रभावित भएको प्रवक्ता काङ्खलेले बताएका छन् । सबै सीप र तालिम भौतिक उपस्थितिमा नै गर्नु पर्ने भएकाले पनि रकम फ्रिज भएको मन्त्रालले जनाएको छ । कतिपय तालिम त आवासीय सुविधासहित रहेको मन्त्रालले जनाएको छ । यो वर्ष सीप तथा तालिम कार्यक्रममा १० प्रतिशत पनि उपलब्धि हासिल गर्न नसकिएको प्रवक्ता काङ्खलेले जानकारी दिए ।
सरकारले आगामी आर्थिक वर्ष ०७८÷७९ मा पनि १ लाख व्यक्तिलाई छोटो अवधिका सीप तथा तालिम प्रदान गर्ने उद्देश्यले ४० करोड बजेट बिनियोजन गरेको छ । विदेशबाट फर्किएका र देशभित्रै रोजगारी गुमाएकालाई हस्तकला, बिजुली मर्मत, ब्युटिसियन, सिलाइकटाइलगायत विभिन्न सीपमूलक तालिम प्रदान गर्न उक्त बजेट विनियोजन गरिएको हो ।
-1745656903.jpeg)