काठमाडौं– बहराइन सरकारले नेपाली नागरिकलाई प्रवेशमा रोक लगाएको छ । २३ मे अर्थात् आइतबारदेखि नेपालीसहित अन्य चार राष्ट्रका नागरिकलाई त्यहाँ प्रवेशमा रोक लगाइएको हो ।
बहराइनले नेपालीसहित भारत, पाकिस्तान, श्रीलंका र बंगादेशबाट आउने यात्रुलाई प्रतिबन्ध लगाएको बहराइनमा रहेको नेपाली दूतावासले जनाएको छ । दूताबासले एक सूचना जारी गर्दै यस्तो जानकारी दिएको हो । यी देशबाट बहराइनी नागरिक, गल्फ कोअपरेसन काउन्सिलका नागरिक तथा बहराइनको बसोबासको भिसा भएकाले भने प्रवेश पाउने सूचनामा भनिएको छ । तर, यी देशबाट यात्रा गर्ने त्यस्ता यात्रुहरूले १० दिन अनिवार्य क्वारेन्टाइनमा भने बस्नुपर्नेछ ।
साथै यात्रा गर्नुअघि ४८ घन्टा भित्रको पिसिआर परीक्षण गरेको र क्युआर कोडसहितको नेगेटिभ रिपोर्टसमेत पेस गर्नु जनाइएको छ । बहराइनमा १० दिनभन्दा बढी बस्ने यात्रुको लागि एयरपोर्ट आगमनपश्चात् बहराइन दिनार ३६ तिरेर पहिलो पटक तथा पाचौँ र दसौँ दिनमा समेत पिसिआर परीक्षण गर्नु पर्ने जनाइएको छ ।
यसैगरी, बहराइनमा पछिल्ला केही दिन यता कोरोना संक्रमण दर बढेकाले संक्रमण रोकथाम तथा नियन्त्रणका लागि कडाइ गरिएको छ । ३ जुनसम्मका लागि सरकारी कार्यालयहरू, सपिङ मल, रेस्टुरेन्ट, सिनेमा घर आदि सार्वजनिक ठाउँहरूमा १८ वर्षभन्दा माथिका तथा दोस्रो डोज खोप लगाएको १४ दिन बढी भइसकेको र कोरोना संक्रमण निको भएकाहरूले मात्र अनुमति पाउनेसमेत दूतावासले जारी गरेको सूचनामा भनिएको छ । यी ठाउँमा प्रवेश गर्नका लागि ‘विअवेयर’ एप्लिकेसनमा ‘ग्रिन सिल्ड’समेत अनिवार्य देखाउनु पर्ने जनाइएको छ ।
निजी भेला समारोहमा अधिकतम ६ जनाको सहभागिता निश्चित गरिएको दूतावासले जनाएको छ । कोरोना संक्रमण रोकथामका लागि जारी मापदण्ड नमान्नेलाई बहराइन दिनार १ हजारदेखि १० हजारसम्म र कम्तिमा तीन महिनाको जेल सजाय वा दुवै हुन सक्ने सूचनामा भनिएको छ । बहराइन सरकारले त्यहाँ रहेका आप्रवासी श्रमिकलाई पनि खोप उपलब्ध गराइरहेको छ । खोप लगाउन बहराइन सरकारको स्वास्थ्य मन्त्रालयमा आवेदन दिन सकिने पनि जनाइएको छ ।
यसैगरी, २४ मे अर्थात सोमबारदेखि अर्को सूचना जारी नभएसम्मका लागि दूतावासबाट लिनु पर्ने सेवा लिन आउनुभन्दा पहिले फोन गरेर आउन पनि दूतावासले आग्रह गरेको छ । फोनबाट समय लिएर मात्रै कार्यालयमा उपस्थित हुन भनिएको छ । यसबाट सेवा प्रवाहसमेत हुने र अनावश्यक भिडभाडका कारण हुने संक्रमणबाट बच्न पनि सकिने दूतावासले विश्वास लिएको छ ।
