काठमाडौं– बुधबार रातिदेखि नेपालको एक मात्र अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थलाई ट्रान्जिटका रूपमा प्रयोग गर्न नपाइने भएको छ । कोरोनाको नयाँ भेरियन्टको जोखिम बढेसँगै सरकारले त्रिभुवन अन्तर्राष्ट्रिय विमानस्थललाई ट्रान्जिट बनाउने यात्रुलाई बुधबार राति १२ बजेदेखि रोक्ने निर्णय गरेको हो ।
विमानस्थललाई ट्रान्जिटको रूपमा प्रयोग गरी अन्य गन्तव्यतर्फ यात्रा गर्नका लागि १४ बैशाखदेखि रोक लगाउने अध्यागमन विभागले जानकारी दिएको छ । विदेशबाट नेपाललाई अन्तिम गन्तव्यस्थल बनाई आगमन गर्न र नेपालबाट विदेश जानको हकमा भने साविकबमोजिम नै रहने समेत विभागले जानकारी दिएको छ ।
पछिल्लो समय भारतीय नागरिकहरूले नेपालको विमानस्थललाई ट्रान्जिटका रूपमा प्रयोग गर्दै आएका थिए । विमानस्थल स्रोतका अनुसार १ देखि २५ अप्रिलसम्म ७ हजार ५०५ जना भारतीय नागरिकले विमानस्थललाई ट्रान्जिटका रूपमा प्रयोग गरेका थिए । भारतमा कोरोनाको जोखिम बढ्दै जाँदा विभिन्न देशहरूले भारतसँगको हवाई उडानमा प्रतिबन्ध लगाएको छ । त्यसपछि भारतीयहरूले विभिन्न मुलुकमा जानका लागि नेपालको बाटो प्रयोग गर्दै आएका छन् ।
कतारमा क्वारेन्टाइन अनिवार्य
कतार जाने कामदारले अनिवार्य रूपमा क्वारेन्टाइन बस्नुपर्ने भएको छ । कोरोना भाइरस (कोभिड–१९) को संक्रमण फैलिन नदिन कतार आउने ६ वटा मुलुकबाट त्यहाँ जाने कामदारले अनिवार्यरूपमा क्वारेन्टाइन बस्नु पर्ने भएको हो ।
नेपालसहित ६ वटा मुलुकका नागरिकलाई अनिवार्यरूपमा होटलमा क्वारेन्टाइन बस्नुपर्ने व्यवस्था गरिएको कतारमा रहेको नेपाली दूताबासले जनाएको छ । नेपालसँगै भारत, बंगलादेश, पाकिस्तान, श्रीलंका तथा फिलिपिन्सबाट कतार जानेहरूले अनिवार्यरूपमा होटलमा क्वारेन्टाइनमा बस्नुपर्ने व्यवस्था गरिएको जनाइएको छ । यी मुलुकहरूबाट जाने वा यी मुलुकलाई ट्रान्जिट बनाएर जानेहरूका लागि यस्तो सर्त राखिएको कतारका स्थानीय सञ्चारमाध्यमले बताएका छन् ।
