काठमाडौं– प्रगतिशिल वैदेशिक रोजगार व्यवसायी मञ्चका महासचिव कुमार केसीले व्यवसायीलाई राहत दिनेतर्फ सबैले ध्यान दिनुपर्ने बताएका छन् । कोरोनाको महामारीका बीच सरकार र वैदेशिक रोगारीका क्षेत्रमा काम गर्ने संघ÷संस्थाले त्यसतर्फ ध्यान दिनुपर्ने उनले बताएका हुन् ।
व्यवसायीका तमाम समस्याहरू रहेको र ती समस्या समाधानका लागि नेपाल वैदेशिक रोजगार व्यावसायी संघले पहल गर्नु पर्ने उनले बताएका छन् । संघले सरकारसँग समन्वय गरेर व्यवसायीलाई राहत दिनेतर्फ लाग्नुपर्ने उनको भनाइ छ । व्यवसायीलाई अहिले कार्यालय सञ्चालन गर्नसमेत समस्या भइरहेको भन्दै संघले त्यसतर्फ ध्यान दिनुपर्ने उनले भने ।
थलिएको व्यवसायलाई चलायमान बनाउनका लागि व्यवसायीले राखेको धरौटी रकममध्ये केही रकम व्यवसायीलाई ऋणका रूपमा दिन सक्ने अवस्था थियो तर, त्यस विषयमा लबिङ पुग्न नसकेको उनले बताएका छन् ।
केही समयका लागि निश्चित रकम ऋण उपलब्ध गराएको खण्डमा व्यवसायलाई निकै राहत पुग्ने र त्यसमा महासंघले पहल गर्नुपर्ने उनले बताएका छन् । ‘करिब–करिब किनारा लागिसकेको थियो आधिकारिक निकाय संघ भएको हुनाले यसलाई गम्भीरताका साथ लिएर अगाडि बढ्नु पर्ने थियो,’ महासचिव केसीले भने । संघको नेतृत्वमा नेपाली कांग्रेससम्वद्ध व्यक्तिहरू हुनु र सरकार कम्युनिस्टको भएकाले सरकारले काम गर्न नचाहेकोे उनको अनुमान छ । अहिले व्यवसाय नवीकरणको समय आइरहेकाले एक सय जना कामदार पठाउनु पर्ने व्यवस्थामा पनि सरकारसँग संघले पहल गर्नुपर्ने उनले बताएका छन् ।
त्यस्तै, साउदी जाने कामदारले महँगोमा टिकट काट्नु परिरहेको भन्दै त्यसमा पनि संघले समन्वय गर्न नसकेको महासचिव केसीले आरोप लगाएका छन् । ‘अहिलेको संघको नेतृत्व गरेका साथीहरूको सरकारसँग पहँुचका नभएर हो या कुरा गर्नै नचाहेर हो बुझ्न नसकिएको छैन,’ उनले भने, ‘विदेशमा कामदार पठाउने वा नपठाउने भन्ने विषयमा राज्यले नै भूमिका खेल्नु पर्छ ।’
यसैगरी, वैदेशिक रोजगार क्षेत्रका नेतृत्वमा रहेकाहरू नै यस क्षेत्रको समस्या समाधानतर्फ नलागेको आभास भएको उनले बताएका छन् । महासचिव केसीले भने, ‘कोरोना संक्रमणको कारण देखाएर घर बिदामा आएर साउदी फर्कन चाहने युवाहरूलाई ६० हजार रूपैयाँसम्म हवाइ भाडा बेहोर्नु पर्ने अवस्थाको सिर्जना भएको छ । संघका पदाधिकारी, पूर्वअध्यक्षज्यूहरू, प्रगतिशील वैदेशिक रोजगार व्यवसायी मञ्च नेपाल, लोकतान्त्रिक फोरम र व्यवसायीका क्षेत्रीय, भेगीय शीर्षस्थ नेतृत्वलगायत नेताहरू रिसोर्टमा पार्टीमा व्यस्त हुनुहुन्छ, धरातल बिर्सिएर जनताको काम गर्न सकिन्न, एनजिओ तथा आइएनजिओले देशलाई बर्बाद पार्न लाग्यो भनेर चिन्ता गर्नेसमेतको उपस्थितिले व्यवसायीका मुद्दालाई सम्बोधन गर्लान् भन्ने रत्तिभर अपेक्षा गर्न सकिन्न ।’
