काठमाडौं– नेपालबाट विभिन्न कामका सिलसिलामा विदेशमा रहेका नेपालीहरूमा कोरोना संक्रमणबाट ज्यान गुमाउनेको संख्यामा वृद्धि हुँदै गएको छ । गैरआवासीय नेपाली संघ (एनआएन)अन्तर्गतको स्वास्थ्य समितिले दिएको जानकारीअनुसार यो साता मात्रै विदेशमा २३ जना नेपालीको ज्यान गएको हो ।
स्वास्थ्य समितिका संयोजक डा.सन्जीव सापकोटाका अनुसार भारतमा सबैभन्दा बढी २० जना नेपालीको ज्यान गएको छ । त्यस्तै यो साता कुवेतमा २ जना र कतारमा १ जना नेपालीको कोरोनाका कारण निधन भएको छ ।
भारतको नयाँ दिल्लीमा कार्यरत स्वास्थ्य समितिका सदस्यसमेत रहेका ‘अल इन्डिया इन्टिच्युट अफ मेडिकल साइन्स’मा कार्यरत डा.सागर पौडेलका अनुसार भारतको नयाँदिल्लीमा १० जना र भारतका अन्य क्षेत्रमा थप १० गरी कुल २० जना नेपालीको निधन भएको हो । निधन हुनेमा अधिकांश ५० वर्षभन्दा मुनिका व्यक्तिहरू रहेको जनाइएको छ । योसँगै हालसम्म विश्वका विभिन्न २१ मुलुकमा कोरोना संक्रमणका कारण ३७२ जना नेपालीको ज्यान गएको गैरआवासीय संघले जनाएको छ । त्यसमध्ये पनि २४५ जना मध्यपूर्वका रहेको बताइएको छ ।
अहिलेसम्म विश्वका ५४ मुलुकमा कोभिड–१९ का कारण संक्रमित हुने नेपालीको संख्या ६८ हजार ५०६ जना पुगेको छ । कुल संक्रमितमध्ये ९४ दशमलव ६ प्रतिशत अर्थात ६४ हजार ७४४ जना संक्रमणमुक्त भएका छन् । यो साता भारत, कुवेत, कतार, युएई, रोमनिया, रुस, फिनल्याण्ड, डेनमार्क, चेक रिपब्लिक, पोल्याण्डमा रहेका थप नेपालीमा कोरोना भाइरसको संक्रमण देखिएको छ ।
पछिल्लो एक वर्षमा सबैभन्दा बढी मे महिनामा ६८ जना, सेप्टेम्बरमा ६५ जना, अगष्टमा ३६ जना नेपालीको ज्यान गएको डा.सापकोटाले जनाएका छन् । नयाँ वर्ष सुरु भएपछि भने अप्रिल महिनामा २३ जना नेपालीको निधन भएको स्वास्थ्य समितिले जनाएको छ । गत वर्षको जुन, जुलाई, डिसेम्बर र यो वर्षको जनवरी महिनामा सबैभन्दा धेरै नेपालीहरू कोरोना संक्रमणबाट मुक्त भएका थिए ।
यसैबीच, गत वर्षको वार्षिक प्रतिवेदन सार्वजनिक गर्दै स्वास्थ्य समितिका संयोजक डा.सापकोटाले महामारीका दौरान २५० जना डाक्टर र नर्सहरू परिचालन गरिएको जानकारी दिए । उनका अनुसार, नेपाल बाहिर करिब ५ हजार डाक्टर र १५ हजारको हाराहारीमा नर्सहरू रहेका छन् । ती सबै स्वास्थ्यकर्मीहरूलाई एनआरएनमा जोड्न प्रयास भइरहेको पनि उनले बताएका छन् ।
कोरोना फैलाउनेलाई ५ वर्ष जेल
नेपालीहरूको मुख्य श्रम गन्तव्यमध्ये एक साउदी अरबमा कोरोना फैलाउनेलाई ५ वर्ष जेल र ५ लाख साउदी रियाल जरिवाना गर्ने भएको छ । कोरोना भाइसरको महामारी बढ्दै गएपछि साउदी सरकारले कडा नियम ल्याएको हो ।
साउदीका अधिकारीहरूका अनुसार त्यहाँको सार्वजनिक अभियोजनले जानाजान कोरोना भाइरसको संक्रमण फैलाउने जो–कोहीलाई कडा कारबाही गरिने घोषणा गरेको छ । साउदीले आफूले कोरोना संक्रमण नियन्त्रणसम्बन्धी मापदण्ड उल्लंघन गर्नेलाई कडाभन्दा कडा कारबाही गर्ने निर्णय गरेको हो । जसअनुसार ठूलो आर्थिक जरिवाना र जेल सजायसम्म हुने जनाइएको छ ।
यस्तै, कोरोना संक्रमण फैलाउने आप्रवासीलाई पुनः साउदी फर्किन नपाउने गरी देश निकाला गरिने पनि साउदी सरकारले जनाइएको छ । कोरोना भाइरस संक्रमण फैलाउने कार्यलाई साउदीले अपराध भनिसकेको छ । साउदीले अघिल्लो वर्षको १७ डिसेम्बरदेखि त्यहाँका नागरिक र आप्रवासीहरूलाई निःशुल्क रूपमा कोरोनाको खोप प्रदान गर्दै आएको छ ।
साउदीका अधिकारीहरूले जनाएअनुसार साउदीभर विभिन्न ५८७ खोप केन्द्रमार्फत् अहिलेसम्म ८० लाख मानिसलाई खोप लगाइसकेको छ । साउदीको स्वास्थ्य मन्त्रालयका अनुसार त्यहाँ अहिलेसम्म ४ लाख ११ हजार २६३ जनामा कोरोना संक्रमण पुष्टि भएको छ । ६ हजार ८८७ जना कोरोना संक्रमितले ज्यान गुमाइसकेका छन् ।
-1752335779.jpg)
