काठमाडौं– कुवेतमा रहेको नेपाली दूताबासले त्यहाँ रहेका कोरोना भाइरसको संक्रमणबाट बच्न नेपालीलाई सतर्कता अपनाउन आग्रह गरेको छ । विश्वव्यापी महामारीको रूपमा फैलिरहेको कोरोना भाइरस (कोभिड–१९) को संक्रमणबाट बच्न आवश्यक स्वास्थ्य सतर्कता अपनाउन कुवेतस्थित नेपाली दूताबासले अपिल गरेको हो ।
दूताबासले एक सूचना जारी गर्दै कुवेत सरकारले जारी गरेको स्वास्थ्य सुरक्षा सम्बन्धी निर्देशन, प्रोटोकल एवं पूर्वसावधानीका उपायहरूको पूर्ण रूपमा पालना गर्नसमेत आग्रह गरेको छ । साथै दूताबासले उच्च स्वास्थ्य सुरक्षा सतर्कता अपनाउनसमेत अनुरोध गरेको हो । हालैको समयमा कुवेतमा कोभिड–१९ को संक्रमण दर बढिरहेको र यसका कारण ज्यान गुमाउनेको संख्यासमेत बढिरहेको भन्दै सावधानी अपनाउन भनिएको छ ।
‘संक्रमणबाट जोगिन त्यहाँका स्थानीय सरकारले अवलम्बन गरेबमोजिमको स्वास्थ्य सुरक्षा सम्बन्धी निर्देशन, प्रोटोकल एवं पूर्वसावधानीका उपायहरूको पूर्ण परिपालना गरी उच्च स्वास्थ्य सुरक्षा एवं सतर्कता अपनाउनु हुन यस दूताबास नेपाली समुदायलाई हार्दिक अनुरोध गर्दछ,’ दूताबासले जारी गरेको सूचनामा भनिएको छ ।
कोभिड–१९ संक्रमणविरुद्ध अपनाउँदै आएका उपायहरूजस्तै सामाजिक दूरी कायम गर्ने, भिडभाडमा नजाने÷नगर्ने, मास्क तथा पन्जाको प्रयोग गर्ने, शारीरिक स्पर्श नहुने गरी अभिवादन गर्ने, साबुन पानीले पटक–पटक हात धुने तथा ह्यान्ड स्यानिटाइजरले नियमितरूपमा हात सफा गर्न अनुरोध गरिएको छ । साथै खानपानलगायत स्वास्थ्य सरसफाइमा विशेष ध्यान दिन तथा संक्रमित व्यक्तिको सम्पर्कमा आएको खण्डमा र रुघाखोकी, ज्वरोजस्ता कोरोनाका लक्षणहरू देखापरेमा नजिकैको स्वास्थ्य केन्द्र र अस्पतालमा तुरुन्तै सम्पर्क गर्नु हुनसमेत दूताबासले अनुरोध गरेको छ ।
कोभिड–१९ का कारण कुवेतमा नेपालीको समेत मृत्यु बढेपछि दूताबासले सूचना निकालेर सचेत रहन आग्रह गरेको जनाएको छ । यही साता कुवेतमा दुई नेपालीले कोभिडका कारण ज्यान गुमाएका छन् ।
