काठमाडौं– नेपाली कामदारको मुख्य गन्तव्य मुलुकमा कोरोनाको संक्रमण दर बढ्दै गएको छ । गन्तव्य मुलुकहरूमध्ये कतिपय मुलुकमा कोरोनाको संक्रमण बढ्दो क्रममा देखिएको छ । थोरै मुलुकमा भने कोरोना संक्रमणको स्थिति स्थिर देखिएको हो ।
नेपाली श्रमिकको प्रमुख गन्तव्य मुलुकमध्ये एक, मलेसियामा बिहीबार मात्रै २ हजार १ सय ४८ नयाँ संक्रमित भेटिएका छन्, १० जनाको मृत्यु भएको छ । बुधबार १ हजार ८ सय ८९ जना संक्रमित तथा ८ जनाको मृत्यु भएको थियो । मलेसियामा पछिल्लो चार दिनको तथ्यांकका आधारमा बिहीबारको संख्या सबैभन्दा धेरै हो । यस अगाडि मंगलबार १ हजार ७ सय ६७ जनामा संक्रमण पुष्टि भएको जनाइएको छ । सो दिन मलेसियामा १२ जनाको मृत्यु भएको थियो । यसैगरी सोमबार १ हजार ३ सय १७ जना संक्रमित भएका थिए । मलेसियाको स्वास्थ्य मन्त्रालयको तथ्यांकअनुसार हालसम्म मलेसियामा ३ लाख ६७ हजार ९ सय ७७ व्यक्तिलाई कोभिड–१९ को संक्रमण भएको छ जसमध्ये १ हजार ३ सय ६३ जनाको मृत्यु भएको छ । संक्रमित मध्ये ३ लाख ४९ हजार व्यक्ति संक्रमणमुक्त भएको जनाइएको छ ।
यसैगरी, नेपाली श्रमिकको अर्को मुख्य गन्तव्य मुलुक साउदी अरबमा पनि पछिल्ला केही दिनयता कोभिड–१९ को संक्रमण बढ्दो क्रममा देखिएको छ । साउदी अरबका सञ्चारमाध्यमहरूले कोभिड संक्रमितको संख्यामा स्पष्ट वृद्धि देखिएको जनाएका छन् । साउदी अरबको स्वास्थ्य मन्त्रालयका अनुसार आइतबार ७ सय ९९ जना, सोमबार ८ सय ४२ जना, मंगलबार ९ सय ५१ जना तथा बुधबार ९ सय २९ व्यक्तिमा कोभिड–१९ को संक्रमण देखिएको छ । कोभिडका कारण बुधवार त्यहाँ ८ जनाको मृत्यु भएको छ । योसँगै कोभिड–१९ का कारण साउदी अरबमा ज्यान गुमाउनेको संख्या ६ हजार ७ सय ८१ पुगेको छ । साउदी अरबमा हालसम्म ४ लाख १ हजार १ सय ५७ व्यक्तिमा कोभिडको संक्रमण देखिएको छ जसमध्ये ३ लाख ८५ हजार ४ सय ४१ व्यक्ति संक्रमणमुक्त भएका छन् ।
यसैबीच, नेपालीको अर्को गन्तव्य मुलुक संयुक्त अरब इमिरेट्स (युएई) मा कोभिड–१९ को संक्रमण भएका व्यक्तिको संख्या स्थिर जस्तै देखिएको छ । त्यहाँ बिहीबार १ हजार ९ सय २८ व्यक्तिमा कोभिडको संक्रमण देखिएको त्यहाँको स्वास्थ्य मन्त्रालयले जनाएको छ । बिहीबार कोभिडका कारण ४ जनाको ज्यान गएको छ । युएईमा हालसम्म ४ लाख ९१ हजार ४ सय २३ व्यक्ति संक्रमित भएका छन् । जसमध्ये ४ लाख ७५ हजार १२ जना संक्रमणमुक्त भएका छन् । संक्रमितमध्ये ज्यान गुमाउनेको संख्या १ हजार ५ सय ४५ छ । गत जनवरी तथा फेब्रुअरीमा दैनिक ४ हजारको हाराहारीमा संक्रमित देखिइरहेको युएईमा हाल देखिएको संख्या आधा कम हो ।
नेपालीको अर्को मुख्य गन्तव्य मुलुक कतारमा पनि कोभिड संक्रमितको संख्यामा सामान्य वृद्धि देखिएको छ । कतारमा बिहीबार ९ सय ८९ जनामा कोभिडको संक्रमण देखिएको छ । बुधबार ९ सय ८४ जना, मंगलबार ९ सय ८१ जना तथा सोमबार ९ सय ७३ जनामा संक्रमण पुष्टि भएको थियो । बिहीबार कतारमा ९ जनाले ज्यान गुमाए भने बुधबार ८ जनाको ज्यान गएको थियो । हालसम्म कतारमा १ लाख ९३ हजार ९ सय ५२ व्यक्तिमा कोभिडको संक्रमण देखिएको छ । त्यसमध्ये ३ सय ५७ जनाको ज्यान गएको छ भने १ लाख ७१ हजार ९ सय ८५ व्यक्ति संक्रमणमुक्त भएका छन् ।
