काठमाडौं– कतारको सुरा काउन्सिलले नयाँ कानुन पारित गरेको छ । विदेशी श्रमिकका लागि समेत स्वास्थ्य बिमा अनिवार्य गर्ने गरी तयार पारिएको नयाँ कानुन पारित भएको हो ।
कतारमा रोजगारीका लागि तथा भ्रमणमा जानेहरूका लागि पनि अनिवार्य स्वास्थ्य बिमा गर्ने व्यवस्था सो कानुनमा रहेको जनाइएको छ । दोहान्यूजका अनुसार मोम्मद अल मोहमुदको अध्यक्षतामा बसेको काउन्सिल बैठकले सो कानुनको मस्यौदामा छलफल गरी पारित गरेको हो । सो कानुनमा आवासीय अनुमति जारी हुनुअगाडि विदेशी श्रमिकको स्वास्थ्य बिमा गरिएको हुनुपर्ने व्यवस्था गरिएको छ ।
यसले कतारमा रहँदा श्रमिकलाई कुनै स्वास्थ्य समस्या आइपरेमा उपचारका लागि समस्या नहुने र सहज वातावरण निर्माण हुने अपेक्षा गरिएको समाचारमा भनिएको छ । यो नयाँ कानुन लागू भएमा कतारको भ्रमण गर्नेहरू तथा आप्रवासी श्रमिकले उनीहरूको बसाइँ अवधिको स्वास्थ्य बिमा गरिएको प्रमाण पेस गर्नुपर्ने छ ।
आप्रवासी श्रमिकको सम्पूर्ण खर्च रोजगारदाताले व्यहोर्नुपर्ने भएका कारण यस्तो शुल्क रोजगारदाताले श्रमिकसँग लिन नपाइने बताइएको छ । सो कानुन पारित गर्दै सरकारलाई पठाइएको समाचारमा जनाइएको छ । खाडीका मुलुकहरूमा सरकारले बनाउने कुनै पनि कानुन लागू हुनुपूर्व सुरा काउन्सिलमा राय सल्लाहका लागि पठाउनु पर्ने व्यवस्था रहेको छ ।
सुरा काउन्सिलले सो ऐनमा गरिएको प्रावधानलाई इस्लाम धर्मको दृष्टिकोणबाट हेर्ने गर्दछ । जसलाई सरकारले कानुनका रूपमा ल्याउने गर्दछ । सामान्यतयाः सुरा काउन्सिलबाट पारित भएको कानुनलाई मन्त्रिपरिषद्ले पारित गर्ने गरेको छ । यसरी पास गएको कानुन निश्चित समयावधि पछि कार्यान्वयनमा आउँछ ।
