काठमाडौं– इपिएसमार्फत दक्षिण कोरियामा श्रम गरिरहेका आप्रवासी श्रमिकको प्रवेशआज्ञा एक वर्ष थप गरिएको छ । कोरियामा रहेका नेपालीलगायत सम्पूर्ण श्रमिकको प्रवेशाज्ञा एक वर्ष थप हुने भएको हो ।
यहा“को न्याय मन्त्रालयका अनुसार कोरियाको बसाइ अवधि सकिएर कोरोना महामारीका कारण स्वदेश फर्किने वातावरण नभएका श्रमिकले कोरियामा बसाइ अवधि थप्न चाहेमा यही अप्रिल महिनाको १३ तारिखदेखि १ वर्षका लागि प्रवेशाज्ञा थप गर्न पाउने नियम पारित भएको जनाइएको छ ।
प्रवासी श्रमिक युनियन (एमटियू) का अध्यक्ष उदय राईले आगामी डिसेम्बरसम्म तीन वर्षको कार्यकाल सकिने श्रमिक तथा हाल चार वर्ष १० महिनाको भिसा सकिएर स्वदेश फर्किएका श्रमिकको अवधि एक वर्ष थपिने बताएका छन् । यसरी भिसा थपिने भएपछि आगामी डिसेम्बरसम्म तीन वर्षको अवधि सकिने तथा हाल चार वर्ष १० महिनाको अवधि सकिने सम्पूर्ण श्रमिकको कोरिया बसाइ अवधि ५ बर्ष १० महिना हुने छ । तीन वर्षको कार्यकाल सकिने श्रमिकले एक वर्ष थपेर चार वर्ष पूरा गरेपछि पुनः पहिलेकै नियमानुसार एक वर्ष १० महिनाको प्रवेशाज्ञा थप्न सक्ने बताइएको छ ।
एमटियूका अध्यक्ष राईका अनुसार कोरियामा १३ महिनादेखि कोही विदेशी मजदुर भित्रिएका छैनन् । यसबीचमा कम्बोडियाबाट केही श्रमिक भित्रिए पनि अन्य देशबाट श्रमिक भित्र्याउन नसकिएको जनाइएको । यसरी विदेशी श्रमिक नभित्रएसम्म हुन गएको श्रमिक अभावलाई पूर्ति गर्न तथा कोरोनाका कारण स्वदेश फर्किने वातावरण नभएका श्रमिकलाई राहत दिन सरकारले उक्त नियम ल्याएको बताइएको छ ।
