काठमाडौं– कोरोना भाइरस (कोभिड १९) को संक्रमणबाट विदेशमा थप ४ नेपालीको मृत्यु भएको छ । गैरआवासीय नेपाली संघअन्तर्गतको स्वास्थ्य समितिका संयोजक डा.सन्जीव सापकोटाका अनुसार यो साता कतारमा ३ जना र रुसमा १ जना गैरआवासीय नेपालीको कोरोना संक्रमणका कारण निधन भएको हो ।
गैरआवासीय नेपाली संघ (एनआरएनए) का अनुसार विश्वव्यापी रूपमा फैलिएको कोरोना भाइरस संक्रमणका कारण शनिबार साँझसम्म हालसम्म २३ देशमा रहेका ३ सय ४९ जना नेपालीको निधन भएको छ । संयोजक डा.सापकोटाका अनुसार यो साता माल्दिभ्स, मलेसिया, कतार र युएईमा रहेका नेपालीहरूमा थप कोरोना संक्रमण देखिएको छ ।
हालसम्म ५४ देशमा ६५ हजार २ सय ८७ जना नेपालीमा कोरोना संक्रमण पुष्टि भएको छ । तीमध्ये ६२ हजार ६ सय ६३ जना कोरोना संक्रमणमुक्त भएका छन् । विदेशमा संक्रमणमुक्त हुने दर ९६ प्रतिशत रहेको छ ।
एकै दिन १५ शव ल्याइयो
यता, मलेसियालगायत देशबाट आइतबार एकै दिन १५ जना नेपालीको शव ल्याइएको छ । आइतबार ल्याइएका शवमध्ये १२ वटा शव मलेसियाबाट ल्याइएका छ भने कुवेत, कतार र साउदी अरबबाट १–१ वटा शव ल्याइएको हो । आइतबार नेपाल एयरलाइन्समार्फत उनीहरूको शव नेपाल ल्याइएको वैदेशिक रोजगार बोर्डले जनाएको छ ।
वैदेशिक रोजगार बोर्डका अनुसार आइतवार मलेसियाबाट ल्याइएका शवमध्ये महोत्तरीका देवेन्द्रकुमार यादव, नवलपरासीका नुमबहादुर लुङ्गेली मगर, सर्लाहीका चन्द्रकुमार साह, गोर्खाका मेघबहादुर कुँवर तथा सूर्य विकको शव रहेको छ । यसैगरी, भोजपुरका भुपाल पाण्डे, पाँचथरका सूर्यबहादुर चौहान, सुनसरीका विष्णु राजधामी र महेन्द्रप्रसाद मेहता, बाग्लुङका चन्द्रबहादुर विक, बाँकेका विनय कहर तथा झापाका उज्ज्वल भुजेलको शव आइतबार मलेसियाबाट नेपाल ल्याइएको बोर्डले जनाएको छ ।
कोरोनाका कारण वाइडबडी विमान जान नपाएकाले रोकिएका १८ मध्ये १२ वटा शव नेपाल ल्याइएको बोर्डले जनाएको छ । अहिले कोरोनाका कारण नभई अन्यै कारणले मृत्यु भएका व्यक्तिहरूको शव नेपाल ल्याइएको बोर्डले जनाएको छ । त्यस्तै कुवेत, कतार र साउदी अरबबाट पनि १–१ शव नेपाल ल्याएको बोर्डको जनाएको छ । जसअनुसार कुवेतबाट सर्वराज कार्की, कतारबाट देवकुमार लिम्बू र साउदीबाट अमनराज पौडेलको शव नेपाल ल्याइएको बोर्डले जनाएको छ ।ब
