काडमाडौं– साउदी अरबमा रहेको नेपाली दूताबारले हुन्डी, हवाला वा अन्य कुनै पनि गैरकानुनी माध्यमबाट रकमको कारोबार तथा गैरकानुनी कार्य नगर्न आग्रह गरेको छ । बुधबार एक विज्ञप्ति जारी गर्दै साउदी दूताबासले यस्तो आग्रह गरेको हो ।
दूताबासले स्वदेशमा रकम पठाउँदा बैंकिङ माध्यमबाट मात्र पठाउन अनुरोध गरेको छ । त्यस्तै साउदी अरबको धर्म, संस्कृति, परम्परा, रीतिरिवाज र राजनीतिक व्यवस्थाको विपरीत हुने कुनै पनि कार्य नगर्नसमेत विज्ञप्तिमा भनिएको छ । साउदी अरबमा मदिराजन्य पदार्थको उत्पादन, बेचविखन, ओसारपसार, सेवन तथा लागू पदार्थको सेवन वा कारोवार पूर्णगैरकानुनी कार्य भएकाले त्यस्तो कार्यमा संलग्न नहुन पनि दूताबासले त्यहाँ रहेका नेपालीलाई आग्रह गरेको छ ।
दूताबासले कुनै पनि किसिमको धार्मिक तथा सांस्कृतिक क्रियाकलाप गर्दा आफ्नो कोठाभित्र मात्र सीमित राख्नसमेत भनेको छ । आफ्नो फोनबाट अरूलाई कुरा गर्न नदिन र आफूले पनि आफ्नो फोनबाट अपरिचित पुरुष–महिलालाई सम्पर्क गरेर अनावश्यक कुरा नगर्नसमेत भनेको छ ।
त्यसैगरी, साउदीमा राजनीतिक सभा, सम्मेलन, गोष्ठी गर्नु पूर्णगैरकानुनी भएकाले त्यस्ता कार्य नगर्नसमेत भनिएको छ । यस्तो कार्यमा संलग्न भएको खण्डमा ठूलो सजायसमेत हुनेतर्फ सजग रहन विज्ञप्तिमा भनिएको छ । त्यस्तै छुट्टीमा वा रोजगार करार सम्झौता समाप्त गरी नेपाल फर्कँदा वा साउदी ओहोरदोहोर गर्दा साउदी अरबको कानुनले निषेध गरेका कुनै पनि सामान नबोक्न पनि आग्रह गरिएको हो । यस्तो कार्यले कामदारलाई समस्या पर्ने दूताबासको भनाइ छ ।
कुनै अन्य व्यक्तिका कानुनले बर्जित मालसामान बोकेको खण्डमा त्यसको सम्पूर्ण जिम्मेवार आफैँ हुनु पर्ने भएकाले अन्य व्यक्तिका सामानहरु पनि आफूले नबोक्न दूताबासले अनुरोध गरेको छ । साथै स्थानीय कानुन, ट्राफिक नियम र अनुशासनको पालना गर्न तथा कानुनी कारबाही हुनबाट बच्न सबैलाई अनुरोध गरिन्छ विज्ञप्तिमा भनिएको छ । साउदी अरबको साइबर अपराधविरूद्धको कानुन, २००७ को कसैले उल्लंघन गरेमा ५ वर्षको जेल सजाय वा ३० लाख रियालसम्म जरिवाना वा दुवै सजाय हुने भएकाले सो कानुनको प्रतिकूल हुने कुनै पनि गतिविधिहरू नगर्न दूताबासले अनुरोध छ ।
-1745656903.jpeg)