काठमाडौं– करार सम्झौताभन्दा फरक काम र कम्पनी नोंज्न साउदी अरबमा रहेको नेपाली दूताबासले आग्रह गरेको छ । साउदी सरकाले काफला प्रणालीलाई सुधार गर्दै रोजगारदाता परिवर्तन गर्न पाउने नियम बनाए पनि बढी तलबको लोभमा काफला प्रणाली हस्तान्तरण नभएसम्म कम्पनी परिवर्तन नगर्न दूताबासले आग्रह गरेको हो ।
यो समयमा कम्पनी परिवर्तन गर्दा कामदारलाई समस्या आइपर्ने भएकाले दूताबासले त्यसतर्फ सजक हुन त्यहाँ रहेका नेपाली श्रमिकलाई अनुरोध गरेको छ । दूताबासले काफला प्रणाली लागू नभएसम्म कम्पनी परिवर्तन गर्नु साउदीमा अपराध ठहरिने भएकाले यस्तो कार्य नगर्न नेपाली श्रमिकलाई आग्रह गरेको हो । यसरी कम्पनी छाडेर वा भागेको अवस्थामा अवैध हुन गई स्वदेश फर्किन तथा बिरामी भए उपचार गर्नसमेत समस्या पर्ने भएकाले यस्तो कार्य नगर्न दूताबासले अनुरोध गरेको छ ।
यस्तै, अवैध रुपमै काम गरिरहेको अवस्थामा दुर्घटनामा परी ज्यान गएमा पनि परिवारले सामाजिक सुरक्षा जीवन बिमामार्फत कुनै पनि रकम नपाइने दूताबासले जनाएको छ । त्यसैले नेपाली श्रमिकलाई सचेत हुन दूताबासले आग्रह गरेको जनाएको छ । यस्तै साउदीलगायत अरु देशमा पनि करार अवधिभन्दा बढी बस्न पाइँदैन । त्यसैले आफ्नो करार अवधि सकिनुभन्दा अगाडि नै एक्जिट भिसा लगाउने वा करार सम्झौता नवीकरण गर्नेबारे यकिन गर्न पनि दूताबासले सबैलाई आग्रह गरको छ ।
यसैबीच, आफ्नो अकामा अरुलाई नदिन पनि दूताबासले सबैलाई जानकारी गराएको छ । आफ्नो अकामा अरुले गलत प्रयोग गरेमा त्यसको दोष जसको अकामा हो उसैलाई आउने भएकाले त्यस्तो कार्य नगर्न दूताबासले आग्रग गरेको हो । यस्तै मुद्दा मामिला भई नेपाल फर्केको र फेरि साउदी जान लागेको अवस्थामा पुरानो अकामामा कुनै मुद्दा मामिला भए नभएको यकिन गरेर मात्र जान पनि दूताबासको अनुरोध छ । यदि पुरानो अकामामा त्यस्तो मुद्दा भएमा विमानस्थलबाटै पक्राउ पर्ने भएकाले त्यस्तो कार्य नगर्न दूताबासले भनेको छ ।
-1745656903.jpeg)