काठमाडौं– वैदेशिक रोजगारीका लागि विभिन्न देशमा गएर स्वदेश फर्केकाहरुको पूर्वसिकाइ पहिचान परीक्षण गरिने भएको छ ।
आइतबार अर्थात २२ चैतदेखि विदेशमा रोजगारी गरेर आएकाहरुको सुरक्षित आप्रवासन परियोजना (सामी) ले परीक्षण गर्ने व्यवस्थाव मिलाउन लागेको हो । राष्ट्रिय सीप परीक्षण समितिसँगको समन्वयमा विदेशमा काम गरेर स्वदेश फर्किएकाहरुलाई निःशुल्क सीप परीक्षण गर्ने सुविधा प्रदान गर्न लागिएको सीमा परियोजनाका सीप विकास संयोजक सुनिला बनियाले जानकारी दिइन् ।
उनका अनुसार विदेशमा गरेको कामको पुनः परीक्षण गरी प्रमाणपत्र पनि प्रदान गरिने छ । जसबाट स्वदेश फर्केकाहरुसँग पनि सीपको प्रमाणपत्र हुनेछ । यो कार्यक्रममा राष्ट्रिय व्यावसायिक योग्यता प्रणाली परियोजना र राष्ट्रिय सपि परीक्षण बोर्डको पनि सहयोग रहने बनियाले बताइन् ।
यो परीक्षणमा वैदेशिक रोजगारीमा आफूले गरेको कामको परीक्षण गरेर प्रमाणपत्र लिन पाइने जनाइएको छ । जसले कामदारले कुनै ठाउँमा काम पाउनका लागि सहज हुने बनियाले जानकारी दिइन् ।
परीक्षण ७ देखि १५ दिनको हुने र पहिलो चरणमा यो कार्यक्रममा ३० जनाको सहभागिता हुनु संयोजक बनियाको भनाइ छ । पहिलोपटक भएकाले यसलाई परीक्षणका रुपमा हेरिएको उनले बताइन् । स्वीस सरकार र नेपाल सरकारको सहयोगमा सञ्चालित परियोजनाले अहिले काठमाडौंसहित देशका विभिन्न ४० वटा जिल्लाको १ सय ५६ वटा स्थानीय तहमा सञ्चालन भइरहेको छ । परियोजनाले वैदेशिक रोजागारीमा जाने श्रमिकलाई विभिन्न विषयमा दक्ष बनाए पठाउने उद्देश्यका साथ काम गरिरहेको सीप विकास संयोजक बनियाले जानकारी दिइन् ।
