तस्बिरः गुगल
काठमाडौं– आउँदो १ बैशाखदेखि अन्तर्राष्ट्रिय विमानस्थलको श्रम कक्षमा बायोमेट्रिक हाजिरी नमिलेमा वैदेशिक रोजगारीमा जान नपाइने भएको छ ।
बायोमेट्रिक हाजिरी नभएका विदेश जान हिँडेका श्रमिकलाई श्रम कक्षबाट फर्काइने भएको हो । वैदेशिक रोजगारीमा जाने श्रमिकले जानुपूर्व तोकिएअनुसारको अभिमुखीकरण तालिम र बायो नलिई प्रमाणपत्र मात्र लिने गरेको र नक्कली बायोमेट्रिक लिएर विदेश जाने गरेको पाइएको भन्दै वैदेशिक रोजगार विभागले यस्तो निर्णय गरेको हो । विदेश जाने श्रमिकहरुको श्रम कक्षमा बायोमेट्रिक हाजिरी नमिलेमा उनीहरुलाई त्यहाँबाट फर्काइने विभागले जनाएको छ । वैदेशिक रोजगार ऐन र नियमावलीले वैदेशिक रोजगारीमा जाने श्रमिकले अनिवार्य रूपमा पूर्वप्रस्थान अभिमुखीकरण तालिम लिनुपर्ने व्यवस्था गरेको छ ।
अभिमुखीकरण तालिम दिने संस्थाले समेत तोकिएको समयमा सम्बन्धित व्यक्तिको बायोमेट्रिक हाजिरी गराई तालिम दिनुपर्ने हुन्छ । त्यो हाजिरीको विवरण विभागको अनलाइन सूचना व्यवस्थापन प्रणालीमा उपलब्ध गराउनु पर्ने उल्लेख छ । तर पछिल्लो समय अनिवार्य रूपमा लिनुपर्ने अभिमुखीकरण तालिम नलिई तालिमको प्रमाणपत्र मात्र लिने र दिने गरिएको पाइएको भन्दै त्यसमा कडाइ गरिएको विभागले जनाएको छ ।
विभागका अनुसार तोकिएको समयभित्र तालिम नलिएको तथा अर्कै व्यक्तिको बायोमेट्रिक हाजिरी विवरण रेकर्ड गराई तालिम लिएको कारणले विभागको श्रम कक्षमा वैदेशिक रोजगारीमा जाने श्रमिकको हाजिरी विवरण नमिल्ने गरेको बताइएको छ । यसरी हाजिरी नमिल्दा इन्स्योरेन्स तथा कल्याणकारी कोषबाट प्राप्त हुने सुविधाबाट श्रमिक वञ्चित हुनेछन् ।
साथै बायोमेट्रिक नमिल्दा विदेशबाट पुनः श्रम स्विकृति लिनसमेत गाह्रो हुने बताइएको छ । त्यस्तै गन्तव्य देशसम्बन्धी जानकारी, वैदेशिक रोजगार सम्बन्धी कानुन तथा अन्य आवश्यक जानकारीसमेत नहुँदा श्रमिकलाई नै परदेशमा जोखिम हुने बताइएको छ । त्यसैले वैदेशिक रोजगारीमा जानुअघि अनिवार्य रूपमा पूर्वप्रस्थान अभिमुखीकरण तालिम लिन विभागले आग्रह गर्दै आएको छ ।
