काठमाडौं– विश्वका विभिन्न देशमा रहेका ६३ हजारभन्दा बढी नेपालीमा कोरोना संक्रमण देखिएको छ । गैर आवासीय नेपाली संघका अनुसार कोरोनाको प्रकोप सुरु भएदेखि हालसम्म ६३ हजार ८ सय ५४ जना नेपालीमा कोरोना संक्रमण पुष्टि भएको हो ।
संघका अनुसार हालसम्म ५३ देशमा रहेका नेपालीमा कोरोना संक्रमण भएको पाइएको छ । जसमध्ये अहिलेसम्म ३ सय ४५ जनाले ज्यानसमेत गुमाएको संघको स्वास्थ्य समितिको तथ्यांकले देखाएको छ । हालसम्म २२ देशमा रहेका नेपालीहरुको मृत्यु भएको समितिले जनाएको छ ।
समितिका अनुसार कोरोना संक्रमणबाट गएको साता मात्रै थप ३ नेपालीको ज्यान गएको हो । गएको साता बेलायतमा २ जना र क्यानडामा १ जनाको मृत्यु भएको स्वास्थ्य समितिका संयोजक डा.सञ्जीव सापकोटाले जानकारी दिए । गएको साता बेल्जियम, मलेसिया र युएईमा रहेका नेपालीहरूमा थप कोरोना संक्रमण देखिएको डा.सापकोटाको भनाइ छ ।
विदेशमा कोरोना संक्रमित भएकामध्ये ९६. ८ प्रतिशत निको भएका छन् । ६३ हजार ८ सय ५४ जनामध्ये ६१ हजार ९ सय ८० जना कोरोना संक्रमणमुक्त भएको बताइएको छ । स्वास्थ्य समितिका संयोजक डा.सापकोटाले पछिल्ला दिनमा भारतमा संक्रमण दर तीव्र रुपमा फलिएको र भारतबाट नेपाल फर्किनेको संख्या पनि बढिरहेको बताए । खुला सिमाना भएका कारण भारतबाट आउनेक्रम बढेकाले सबैलाई अनिवार्य स्वास्थ्य मापदण्ड अपनाउन पनि संघले अनुरोध गरेको छ ।
पुनः कोरोना भाइरसको प्रकोप बढेकाले स्वास्थ्य सतर्कता अपनाउनुका साथै सबैले मास्क लगाउने, सामाजिक दूरी कायम गर्ने, व्यक्तिगत सरसफाइमा ध्यान दिनेलगायत जनस्वास्थ्यको विभिन्न उपाएहरु अपनाउन पनि डा.सापकोटाले सुझाब दिएका छन् ।
