काठमाडौं– वैदेशिक रोजगार बोर्डले कोरोनाबाट ज्यान गुमाएकाको परिवारलाई ६ करोडभन्दा बढी राहत प्रदान गरेको जनाएको छ । बोर्डका अनुसार कोरोनाले ज्यान गुमाएका परिवारका सदस्यलाई ६ करोड ८२ लाख ५० हजार राहत प्रदान गरिएको हो ।
बोर्डले कोरोनाले विदेशमा ज्यान गुमाएका २ सय ७४ जनामध्ये ९१ जनाका परिवालाई राहत वितरण गरिएको बोर्डका निर्देशक तथा सूचना अधिकारी दिनबन्धु सुवेदीले जानकारी दिएका छन् । प्रत्येक व्यक्तिका परिवालाई बोर्डले रु ७ लाखका दरले सहयोग गरिएको उनको भनाइ छ । कोरोनाका कारणले विदेशमै अन्त्येष्टि गर्नु परेकाले थप ५० हजार पनि सहयोग प्रदान गरिएको उनको भनाइ छ । यसरी एक परिवालाई रु ७ लाख ५० हजार क्षतिपूर्ति दिइएको सूचना अधिकारी सुवेदीले बताएका छन् ।
यो वर्ष कोरोनाले गर्दा विदेशमै अन्त्यष्टि गर्नु परेकाले उनीहरूका परिवारलाई सरकारले घोषणा गरेअनुसार नै राहतमा थप सहयोग गरिएको बोर्डले जनाएको छ । साथै बोर्डले प्रदान गर्ने सतप्रतिशत क्षतिपूर्ति लिएको खण्डमा उनीहरूका बच्चालाई छात्रवृत्तिसमेत दिने गरेको सुवेदीले बताए ।
यसैगरी आर्थिक सहायताका लागि स्थानीय तहमै निवेदन दिन सकिने पनि बोर्डले जनाएको छ । जसबाट आर्थिक सहयोग लिनका लागि बोर्डमा आउनु पर्ने वा इमेल गर्न नसक्नेहरूलाई पनि सहज हुने विश्वास बोर्डको रहेको छ । अहिले स्थानीय तहमा गएर आफ्नो निवेदन दिएपछि स्थानीय तहले नै बोर्डमा मेल गर्ने गरेको बोर्डले जनाएको छ । साथै यसबाट बोर्डमै आउनु पर्ने बाध्यताको अन्त्य भएको बोर्डले जनाएको छ । अहिले करिब ६० देखि ७० प्रतिशत गुनासाहरू समेत स्थानीय तहबाटै आउने गरेको बोर्डले जनाएको छ । कोरोनाका कारण भिडभाड गर्नुभन्दा स्थानीय तहबाटै सेवा लिनु स्वास्थ्यका हिसाबले पनि सुरक्षित हुने बोर्डले जनाएको छ ।
