काठमाडौ– वैदेशिक रोजगारीका लागि साउदी अरब जाने श्रमिकको अनिवार्य सीप परीक्षण हुने भएको छ । साउदी सरकारले नै कामका लागि आउने विदेशी श्रमिकको सीप परीक्षण गर्ने भएको हो ।
यो व्यवस्था आगामी जुलाईदेखि लागू हुने साउदी अरबको मानव संशाधन तथा सामाजिक विकास मन्त्रालयले जनाएको छ । प्रतिस्पर्धी जनशक्तिलाई भित्र्याउने उद्देश्यले यस्तो व्यवस्था गर्न लागिएको साउदी सरकारले जनाएको छ । सो कार्यक्रमअन्तर्गत साउदीले कुनै पनि श्रमिकलाई भिसा उपलव्ध गराउनु अगाडि नै सो व्यक्तिको सीप परीक्षण सम्बन्धित मुलुकमा नै गर्ने व्यवस्था गरिने जनाएको छ ।
साउदी अरबको सो निर्णयको विभिन्न देशका दूताबासहरूले स्वागत पनि गरेका छन् । कार्यक्रमअनुसार सीपयुक्त काममा आउनेहरूको सीप परीक्षण सम्बन्धित मुलुकमा नै हुनेछ । यसका लागि अन्तराष्ट्रिय सीप परीक्षण केन्द्रहरूसँग समन्वय हुने पनि जनाइएको छ ।
यसैगरी, साउदी अरबमा नै कार्यरत श्रमिकहरूको पनि सीप परीक्षण गरिने मन्त्रालयले जनाएको छ । साउदी अरबको सो कार्यक्रमको श्रीलंका, पाकिस्तान, इन्डोनेसियालगायत मुलुकका राजदूतहरूले स्वागत गरेको अरब न्यूजले जनाएको छ ।
-1745656903.jpeg)