काठमाडौं– पछिल्लो सयम नेपालबाट विदेशमा जानेको संख्या घट्दै गएको छ । पछिल्लो आठ महिनामा नेपालबाट विदेश जानेहरुको संख्यामा अघिल्लो वर्षको सोही अवधिको तुलनामा २३.८७ प्रतिशतले गिरावट आएको हो । अघिल्लो वर्षको साउनदेखि फागुनसम्मको तुलनामा यो वर्षको साउनदेखि फागनुसम्म विदेश जानेहरुको संख्यामा कमी आएको वैदेशिक रोजगार विभागको तथ्यांकले देखाएको छ ।
अघिल्लो वर्ष साउनदेखि फागनुसम्मको आठ महिनामा नेपालबाट तीन लाख ४८ हजार तीन सय १६ जना नेपाली विदेश गएको भए पनि यो वर्ष यो संख्या घटेर ८३ हजार एक सय ६० मा झरेको वैदेशिक रोजगार विभागका निर्देशक तथा सूचना अधिकारी टीकामणि नेउपानेले जानकारी दिएका छन् । अघिल्लो वर्ष तीन लाख २१ हजार दुई सय ८३ जना पुरुष र २६ हजार ३३ जना महिला विदेश गएको सूचना अधिकारी नेउपानेले बताए ।
यो वर्ष भने ७७ हजार ३५ जना पुरुष र छ हजार एक सय २५ जना महिला विदेशिएका छन् । यो वर्ष आठ महिनाको अवधिमा एक सय ४ देशमा नेपालीहरु गएको विभागको तथ्यांकले देखाएको छ । यो वर्ष सबैभन्दा बढी २४ हजार ५ सय ७१ जना कतार गएका छन् । त्यस्तै युएईमा २४ हजार ५ जना, साउदी अरबमा २१ हजार चार सय २६ जना वैदेशिक रोजगारीका लागि गएको विभागका सूचना अधिकारी नेउपानले जानकारी दिए । उनका अनुसार आठ महिनाको अवधिमा बहराइन २ हजार १० जना गएका छन् । अघिल्लो वर्ष ११ चैतदेखि कोरोनाले गर्दा लकडाउन गरिएकाले पछिल्लो समय विदेश जानेको संख्यामा कमी आएको उनले बताए ।
कोरोनाको कारण अहिले पनि धेरै श्रम गन्तव्यहरु खुला हुन नसकेको नेउपानेले जानकारी दिए । अघिल्लो वर्ष सबैभन्दा बढी मंसिर महिनामा विदेशिएको विभागको तथ्यांकले देखाएको छ । मंसिर महिनामा ५६ हजार ८ सय १० जना विदेशिएको विभागले जनाएको छ । जबकि यो वर्षको मंसिर महिनामा ४ हजार ३ सय ७७ जना विदेश गएका छन् । अघिल्लो वर्ष पुस महिनामा ५२ हजार २ सय २५ जना विदेशिएको भए पनि यो वर्ष जम्मा ७ हजार २ सय ९ जना मात्र विदेशिएका छन् ।
विदेश जानेको संख्यामा कमी आउनुको मुख्य कारण नै कोरोना भएको सूचना अधिकारी नेउपानेले बताएका छन् । अघिल्लो वर्ष यहि समयमा कोरोनाको प्रकोप नरहेको र चैतपछि कोरोना सुरु भएकाले विदेश जानेको संख्यामा कमी आएको उनको भनाइ छ ।
-1745656903.jpeg)