काठमाडौं– वैदेशिक रोजगार बोर्डले विदेशमा रोजगारी गरेर फर्केका तथा रोजगारीका लागि विदेश जाने युवालाई निःशुल्क तालिम दिइरहेको छ । बोर्डले विदेश जाने र विदेशबाट फर्केका युवालाई लक्षित गरी १ फागुनदेखि निःशुल्क तालिम प्रदान गरिरहेको हो । अहिले पनि तालिम लिन चाहनेहरुले तालिम लिन सक्ने बोर्डले जनाएको छ ।
बोर्डले प्राविधिक शिक्षा तथा व्यवसायिक तालिम परिषद् (सिटिइभिटी) सँगको सहकार्यमा वैदेशिक रोजगारमा जान चाहने तथा वैदेशिक रोजगारबाट फर्केका युवालाई लक्षित गर्दै विभिन्न प्रकारका सीपमूलक तालिम निःशुल्क प्रदान गरिरहेको छ । बोर्डले आनो रुची अनुसार तालिममा सहभागी हुनसमेत सबैमा अनुरोध गरेको छ । नेपाली श्रमिक दक्ष भएर मात्रै वैदेशिक रोजगारीमा जाउन् भन्ने उद्देश्यले कार्यक्रम सञ्चालन गरिएको बोर्डले जनाएको छ ।
बोर्डले अहिले कुक, वेटर, हाउस किपिङ, भान्सा सहयोगी, फ्रन्ट अफिस सहायक, सुरक्षा गाड, डकर्मी, हाउस पेन्टर, प्लम्बर सहायक, वेल्डर सहायक, जुनियर फर्निचर मेकर, ब्युटिसियन, जुनियर ब्युटिसियन, सटरिङ कार्पेन्ट्री, एसिस्टेन्ट स्काफोल्डर, इलेक्ट्रिसियनलगायत तालिम सञ्चालन गरिरहेको छ । तालिममा सहभागी सबैको सीप परीक्षणसमेत हुने बोर्डको भनाइ छ । सीप परीक्षणमा पास भएमा परीक्षा दिँदा लागेको शुल्क बोर्डले फिर्ता दिने बताएको छ । तालिममा सहभागीले ९० प्रतिशत हाजिर भएमा मात्र सीप परीक्षणमा भाग लिन पाउने बोर्डको भनाइ छ ।
बोर्डले सञ्चालन गर्ने तालिम प्रदेशअनुसार हुने बताइएको छ । बोर्डले प्रदेश अनुसार तालिम प्रदायक संस्थासमेत तोकिदिएको छ । बोर्ड सचिवालय, सिटिइभिटी तथा तालिम प्रदायक संस्थाहरुबीच तालिम सञ्चालनमा सम्झौतासमेत भइसकेको छ । जसअनुसार प्रदेश १ मा सुम्निमा पोलिटेक्निक इन्स्टिच्युट भोजपुर तथा रत्नकुमार बान्तवा बहुप्राविधिक शिक्षालय इलाममा सीप सिक्न पाइने छ ।
त्यसैगरी, प्रदेश २ का लागि निर्मल लामा बहुप्राविधिक शिक्षालय बर्दिबास तथा बिपी मेमोरियल पोलिटेक्निक इन्स्टिच्युट, धनुषमा सीप सिक्न पाइने छ । यता वागमती प्रदेशका लागि बालाजु स्कुल अफ इन्जिनियरिङ एन्ड टेक्नोलोजी काठमाडौं, बनेपा पोलिटेक्निकल इन्स्टिच्युट काभ्रे, नारायणी बहुप्राविधिक शिक्षालय चितवन तथा जिरी प्राविधिक शिक्षालय दोलखामा सीप सिक्ने कार्यक्रम सञ्चालन भइरहेको छ । यसैगरी, गण्डकी प्रदेशमा पोखरा प्राविधिक शिक्षालय कास्कीमा तालिम लिन पाइने छ । उता लुम्बिनी प्रदेशका लागि कोरिया नेपाल इन्स्टिच्युट अफ टेक्नोलोजी रुपन्देही, सहिद कृष्णसेन इच्छुक बहुप्राविधिक शिक्षालय दाङ र भेरी प्राविधिक शिक्षालय नेपालगन्जमा तालिम लिन पाइन्छ ।
त्यसैगरी, कर्णाली प्रदेशका लागि कर्णाली प्राविधिक शिक्षालय जुम्ला तथा सहिद नेत्रलाल अभागी प्राविधिक शिक्षालय सल्यानमा तालिम प्रदान हुन्छ भने सुदूरपश्चिम प्रदेशका लागि टीकापुर पोलिटेक्निक इन्स्टिच्युट कैलालीमा तालिम सञ्चालन भइरहेको छ । सबै शिक्षालयहरूबाट गरी ७ हजार ३ सय ६० जनालाई सीप विकास तालिम दिने लक्ष्य रहेको बोर्डले जनाएको छ ।
-1745656903.jpeg)