काठमाडौं– वैदेशिक रोजगारीका आधारमा जिविकोपार्जन गर्दै आएका व्यवसायी पलायन हुने पर्ने अवस्था आएको वैदेशिक रोजगार व्यवसायी संघका सचिव मेघनाथ भुर्तेले बताएका छन् । कोरोना भाइरसका कारण रोजगारीका लागि विदेश पठाउने काम रोकिएकाले व्यवसायीले पेसा परिवर्तन गर्नुपर्ने अवस्था आएको उनले बताएका हुन् ।
नेपालबाट वैदेशिक रोजगारीमा जाने अधिकांश गन्तव्यहरू बन्द रहेकाले व्यवसायीहरू मारमा परिरहेको सचिव भुर्तेलको भनाइ छ । नेपाली श्रमिकको मुख्य गन्तव्यका रूपमा रहेको मलेसिया अझै खुलेको छैन । सन् २०२२ को विश्वकप आयोजना गर्ने राष्ट्र कतारमा कामदार माग भए पनि अन्य मुलुकमा कामदार पठाउने काम अत्यन्त न्यून रहेको उनले बताएका छन् । अघिल्लो वर्ष ११ चैतदेखि लकडाउन सुरु भएपछि वैदेशिक रोजगारीमा पठाउने कार्य पूर्ण रूपमा बन्दजस्तै रहेकाले व्यवसायीहरूले पेसा परिवर्तन गर्ने मनस्थिति बनाएको सचिव भुर्तेलको भनाइ छ । यहि पेसामा लागेर गुजारा चलाइरहेका व्यवसायीले व्यापार ठप्प भएका कारण यो व्यवसाय नै धरापमा परेको पनि उनले बताए ।
त्यस्तै पछिल्लो सयम सबैतिरबाट व्यवसायीलाई नै चेपुवामा पारिएकामा पनि उनले गुनासो गरेका छन् । विदेश गएर कति युवाले घरको छाना फेरेको, छोराछोरीलाई निजी विद्यालयमा पढाउने हैसियत राखेको भए पनि यस्ता सकारात्मकभन्दा पनि थोरै भएको नकारात्मक कुरालाई बढी ‘हाइलाइट’ गरिएको उनको गुनासो थियो । आङ्खना देशका दाजुभाइले दुःख पाउँदा आपूmहरूलाई पनि पीडा हुने भन्दै यो क्षेत्रलाई सुधार गर्नका लागि सबैको सहयोग आवश्यक हुने सचिव भुर्तेलेको भनाइ छ ।
सबै व्यवसायी ठीक नहुन सक्छन्, गलत गर्नेलाई सोहीअनुसारको कार्बाही गर्नुपर्ने तर सबैलाई एउटै तराजुमा राखेर हेर्न नहुने उनको तर्फ छ । ‘सबै क्षेत्रमा गलत गर्नेहरू हुन्छन् उनीहरूलाई कार्बाही गर्नुपर्छ, तर सबैलाई एकै बास्केटमा राखेर हेर्न हुँदैन,’ उनले भने । रेमिट्यान्सले देश सञ्चालनमा सहयोग गरेको छ, त्यसतर्फ कसैको ध्यान नजाने तर म्यानपावर व्यवसायीले गलत गरे भन्दै आलोचना मात्रै हुने गरेको पनि सचिव भुर्तेलले गुनासो गरेका छन् ।
गन्तव्य मुलुकहरूमा दोस्रो चरणको कोरोना देखिएकाले विदेशी कम्पनीले कामदार लिने विषयमा अहिले कुरै नगरेकाले व्यावसायीहरू निरास बन्दै गएकाले यसतर्फ खासगरी सरकारले नै उनीहरूको संरक्षणतर्फ ध्यान दिनु पर्ने उनको भनाइ छ । लाखौँ युवालाई रोजगारी दिने व्यावसायलाई सम्मान गर्नु पर्ने पनि उनले बताएका छन् । लाखौँ बेरोजगार युवालाई राज्यले रोजगारी दिन नसकेको अवस्थामा आफूहरूले सहजीकरण गर्ने काम गर्दा पनि सबैतिरबाट आलोचना मात्रै भइरहेको उनले गुनासो गरे ।
