काठमाडौं– नेपालबाट विदेश जाँदा हुने ठगीमा चालू आर्थिक वर्षको छ महिनामा कम उजुरी परेका छन् । चालू आर्थिक वर्षको ६ महिनामा संस्थागत तर्फ ७५.३२ प्रतिशत र व्यक्तिगततर्फ ३४.५५ प्रतिशत कम उजुरी आएका हुन् ।
चालू आर्थिक वर्षको ६ महिनामा संस्थागततर्फ एक सय ८७ वटा ठगीका उजुरी परेको र यो अघिल्लो आर्थिक वर्षको सोही अवधिको भन्दा ७५.३२ प्रतिशतले कम भएको वैदेशिक रोजगार विभागका निर्देशक तथा सूचना अधिकारी टिकामणि नेउपानेले जानकारी दिए । उनका अनुसार अघिल्लो आर्थिक वर्षको पुस महिनासम्म ७ सय ५८ वटा ठगीका उजुरी परेका थिए ।त्यस्तै व्यक्तिगत रुपमा पनि अघिल्लो आर्थिक वर्षको भन्दा चालू आर्थिक वर्षमा कम उजुरी आएको नेउपानेले बताएका छन् । अघिल्लो आर्थिक वर्ष अर्ध वार्षिक अवधिमा व्यक्तिगततर्फ दुइ सय ४६ वटा उजुरी विभागमा आएको भए पनि चालू आर्थिक वर्षको ६ महिनामा एक सय ६१ वटा उजुरी परेको उनले बताए ।
अघिल्लो आर्थिक वर्षको ६ महिनाको तुलनामा चालू आर्थिक वर्षको सोही अवधिमा संस्थागततर्फ दाबी रकम पनि कम रहेको उनको भनाइ छ । अघिल्लो आर्थिक वर्षको ६ महिनामा रु.२३ करोड ९१ लाख, ५ हजार एक सय ९३ क्षतिपूर्ति दाबी गरिएको थियो भने चालू आर्थिक वर्षको ६ महिनामा रु.५ करोड ६१ लाख ६९ हजार ९ सय ४६ क्षतिपूर्ति दाबी गरिएको छ । जुन अघिल्लो ६ महिनाको भन्दा ७६.५० प्रतिशतले कम हो ।
यस्तै, विभागले अघिल्लो आर्थिक वर्षको ६ महिनाको तुलनामा चालू आर्थिक वर्षमा ६५ प्रतिशत बढी बिगो भराउन सफल भएको उनले बताएका छन् । चालू आर्थिक वर्षको ६ महिनामा रु.६ करोड ६८ लाख, ५३ हजार चार सय ७३.२६ बिगो भराइएको छ । जवकि अघिल्लो आर्थिक वर्षको सोही अवधिमा रु.४ करोड २ लाख ७८ हजार पाँच सय बिगो भराइएको थियो ।
त्यसैगरी, व्यक्तिगत रुपमा उजुरी दिने व्यक्तिले चालू आर्थिक वर्षमा रु.१५ करोड ३३ लाख, ७५ हजार बिगो दाबी गरेर उजुरी दिएका छन् । जुन अघिल्लो आर्थिक वर्षको भन्दा १२.१९ प्रतिशतले कम हो । अघिल्लो वर्षको सोही समयमा रु.१७ करोड, ४६ लाख, ६७ हजार बिगो दावी गरिएको थियो । व्यक्तिगत रुपमा आएका उजुरीहरुलाई अदालतमा पेस गरेर कार्बाही गरिने पनि सूचना अधिकारी नेउपानेले जानकारी दिएका छन् । जसमा अघिल्लो आर्थिक वर्षको ६ महिनामा एक सय ४१ मुद्दा अदालतमा दायर गरिएको थियो भने चालू आर्थिक वर्षको सोही अवधिमा ५८ वटा मुद्दा मात्र अदालतमा दायर गरिएको उनको भनाइ छ ।
अदालतमा दायर गरिएको मुद्दामा बिगो दाबी गरिएको रकम पनि चालू आर्थिक वर्षमा २३.१७ प्रतिशतले कम रहेको नेउपानेले बताएका छन् । अघिल्लो वर्षको ६ महिनामा रु. १३ करोड, ७२ लाख ३२ हजार बिगो दाबी गरिएको थियो भने चालू आर्थिक वर्षको सोही अवधिमा रु. १० करोड ५४ लाख २९ हजार बिगो दाबी गरिएको उनको भनाइ छ । व्यक्तिगत रुपमा ठगी भएको भनेर आएका उजुरीमा अदालतमा दायर मुद्दा प्रतिशतसमेत कम देखिएको छ । अघिल्लो आर्थिक वर्षको ६ महिनामा ५७.३ प्रतिशत मुद्दा दायर गरिएको थियो भने चालू आर्थिक वर्षमा ३६ प्रतिशत मुद्दा दायर गरिएको नेउपानेले बताएका छन् । बिगो दाबी प्रतिशत पनि चालू आर्थिक वर्षमा कम देखिएको छ । अघिल्लो आर्थिक वर्षको ६ महिनामा ७८.६ प्रतिशत बिगो दाबी गरिएको थियो भने चालू आर्थिक वर्षमा ६९ प्रतिशत बिगो दाबी गरिएको सूचना अधिकारी नेउपानेले जानकारी दिए ।
तथ्यांकमा घटेको देखिए पनि ठग्ने क्रम भने नघटेको उनको भनाइ छ । कोरोनाका कारण विदेश जाने व्यक्ति नै कम भएकाले तुलनात्मक रुपमा केही कम घटनाहरु देखिए पनि ठग्ने र ठगिने क्रम बढिरहेको नेउपानेले बताएका छन् । ठगी भएको उजुरीमा संस्थागततर्फ खाडी मुलुकमा गएका वा जानेहरु र व्यक्तिगततर्फ भने युरोप तथा अमेरिका जाने वा जान खोज्नेहरु रहेको सूचना अधिकारी नेउपानेले जानकारी दिएका छन् ।
