काठमाडौं– कतारस्थित नेपाली दूताबासले कोरोना भाइरसको महामारी कायमै रहेकाले सतर्कता अपनाउन आग्रह गरेको छ । कतार सरकारले गत ३ फेब्रुवरी २०२१ देखि जारी गरेको सुरक्षाका मापदण्ड पालना गर्न दूताबासले बुधबार एक सूचना जारी गर्दै कोरोना भाइरसको महामारी कायमै रहेकाले सतर्कता अपनाउन आग्रह गरेको छ ।
कतार सरकारले कतारमा बस्ने सबैले पालना गर्नु पर्ने सतर्कता र सुरक्षाका मापदण्डहरु जारी गरेको छ । घरबाट बाहिर निस्कँदा मास्क अनिवार्य लगाउनु पर्ने, घरबाट कुनै पनि कामका लागि बाहिर निस्कँदा चालु अवस्थामा रहेको ऐतराज एप्स हुनै पर्ने, घरभित्र वा बन्द स्थानमा ५ जना र खुल्ला स्थानमा १५ जनाभन्दा बढी भेला हुन नपाइने, कतारभित्र रहेका सबै सार्वजनिक पार्क, सार्वजनिक तटहरु, कर्निसलगायत अन्य सार्वजनिक स्थलहरुमा कुनै पनि प्रकारका सामाजिक जमघट गर्न नपाइने दूताबासले जारी गरेको सूचनामा उल्लेख गरेको छ ।
जसअनुसार ती स्थानहरुमा १५ जनाभन्दा बढी भेला हुन नपाइने, सवारीसाधनमा चालकसहित ४ जनाभन्दा बढी व्यक्तिले यात्रा गर्न नपाइनेजस्ता मापदण्डहरु लागू गरिएकाले ती मापदण्डलाई पूर्ण रुपमा पालना गर्न दूताबासले अनुरोध गरेको हो । यस्तै विहीबार परेको शिवरात्रिको अवसरमा दूताबास बन्द रहनेसमेत दूताबासले जनाएको छ । बुधबार सूचना जारी गर्दै कतारस्थित नेपाली दूताबासले शुक्रबार बिहान ११ बजेदेखि अपराह्न २ बजेसम्म राहदानी वितरण गरिने पनि जनाएको छ ।
