काठमाडौ– वैदेशिक रोजगारीका लागि कोरियामा रहेका विदेशी कामदारले कम्पनी परिवर्तन गर्न सहज हुने भएको छ । कामदारले आफ्नो इच्छाअनुसार रोजगार कम्पनी परिवर्तन गर्न पाउने नियम लागू भएसँगै कोरियामा काम गर्ने विदेशी कामदारले रोजगार परिवर्तन गर्न पाउने भएका हुन् । गत डिसेम्बरमा ग्रिनहाउस आवासमा राखिएकी एक कम्बोडियन श्रमिकको चिसोका कारण मृत्यु भएपछि कोरिया सरकारले यस्तो नियम लागू गरेको हो ।
रोजगारदाताले फिनिल ग्रीनहाउस (प्लास्टिकले बारेका घर) मा बनाइएको अस्थायी बासस्थानजस्ता निम्नस्तरको आवासमा राखेमा प्रवासी कामदारले आफ्नो इच्छाअनुसार कार्यस्थल परिवर्तन गर्न पाउने गरी नियम बनाइएको त्यहाँको श्रम तथा रोजगार मन्त्रालयले जनाएको छ । यसका साथै अत्यन्तै न्यूनस्तरको आवास प्रदान गर्ने कम्पनीमा काम गर्ने प्रवासी कामदारले आफ्नो कार्यस्थल बदल्न अनुमति दिनुका साथै त्यस्ता कम्पनी मालिकलाई विदेशी कामदार राख्न प्रतिबन्ध लगाइने पनि नयाँ लागू गरेको नियममा उल्लेख गरिएको कोरियन सरकारले जनाएको छ ।
ग्रिनहाउस आवासमा राखिएकी एक कम्बोडियन श्रमिकको चिसोका कारण मृत्यु भएपछि श्रमिक संगठनले आवासको राम्रो व्यवस्थासहित इपिएस प्रणालीमा सुधार गर्नुपर्ने भन्दै सरकारलाई दबाब दिँदै आएका थिए । मन्त्रालयले सम्बन्धित सरकारी निकायसँगको सहकार्यमा रोजगार अनुमति प्रणाली (इपिएस) अन्तर्गत कोरियामा काम गरिरहेका विदेशी नागरिकको जीवनस्तरमा सुधार गर्न अन्य तयारीसमेत गरेको बताएको छ ।
हाल प्रवासी कामदारलाई उनीहरूको पहिलो कार्यावधिमा तीनपटक र दोस्रो कार्यावधिमा दुईपटक गरी पाँचवर्षे कार्यकालमा पाँच पटकसम्म कार्यस्थल परिवर्तन गर्न पाउने अधिकार दिइएको छ । यसका लागि कम्पनी परिवर्तन गर्न रोजगारदाताको अनुमति अनिवार्य छ । कम्पनी परिवर्तन गर्ने इपिसएस कामदारले पाँचवर्षे कार्यकाल सकेपछि पुनःकोरियामा रोजगारी गर्न चाहेमा पुनः भाषा परीक्षा दिनुपर्नेलगायतका प्रावधान पनि नयाँ नियममा उल्लेख गरिएको छ । यसैगरी, रोजगारदाताद्वारा कुटपिट गर्ने, यौन दुव्र्यवहार गर्ने, अमानवीय व्यवहार गर्ने, तलब समयमा भुक्तानी नगर्नेलगायत गल्ती प्रमाणित भएमा श्रमिकले आफूखुसी कार्यस्थल परिवर्तन गर्न पाउने पनि बताइएको छ ।
