काठमाडौं– श्रम, रोजगार तथा सामाजिक सुरक्षामन्त्री गौरीशंकर चौधरीले ‘आफूले भनेबमोजिम वैदेशिक रोजगार विभागले म्यानपावरमा अनुगमन र छापा मार्नू’ भनेर नभनेको र बजार अनुगमन नरोकिने वैदेशिक रोजगार विभागले जनाएको छ ।सोमबार सामाजिक सञ्जालदेखि सञ्चारमाध्यममा मन्त्री चौधरीले म्यानपावरमा अनुगमन र छापा आफूले भन्ने विषयमा चौतर्फी आलोचना भइरहँदा मन्त्रीले त्यस्तो भन्दै नभनेको र म्यानपावरमा अनुगमनको काम नराकिने विभागका सूचना अधिकारी टिकामणि न्यौपाने बताए ।
प्रभाव दैनिकसँगको कुराकानीमा सूचना अधिकारी न्यौपानेले भने, ‘मन्त्रीज्यूले त्यस्तो भन्नु भएकै छैन । अनुगमनको काम जारी छ । यदि साँच्चै त्यस्तै नै हो भने विभागलाई जानकारी आउनुपर्ने, हुँदै नभएको कुरालाई कसैले प्रोपोगान्डा मच्चाएको हुन सक्छ ।’ उनका अनुसार म्यानपावरमा अनुगमनको काम निरन्तर अघि बढिरहँदा बाहिर आएको समाचार हल्ला र भ्रम फैलाउन उद्देश्य देखियो । हाल उपत्यकाबाहिर अनुगमन अधिकृत कुशल बरालको नेतृत्वमा विभागको टोलीले म्यानपावर कम्पनीमा अनुगमन गरिरहेको सूचना अधिकारी न्यौपानेले बताए । अहिले विभागको टोली पोखराबाट बुटवलमा रहेको उनले बताएका छन् । उनका अनुसार अब केही दिनमै अनुगमनको रिपोर्ट ल्याएपछि कारबाहीलगायतका प्रक्रियाहरू अघि बढाइनेछ ।
यसैगरी विभागले आइतबार बानेश्वस्थित स्काई नामको कन्लसल्टेन्सीमा अनुगमनका साथै कानुनविपरीत विदेश पठाउन तयारी पारिएको आधादर्जन बढी राहदानी बरामद गरेको पनि उनले बताएका छन् । गैरकानुनी काम गर्ने उक्त कन्सल्टेन्सीलाई कारबाहीको प्रक्रिया अघि बढाइएको सूचना अधिकारी न्यौपानेले बताए ।
मन्त्रालयले आफ्नो अनुकूल मात्र म्यानपावरमा अनुगमन र छापा मार्न लगाउन लागेको हो भन्ने प्रश्न सोध्न मन्त्रालयका प्रवक्ता भरतमणि पाण्डेलाई पटक–पटक फोन सम्पर्क गर्दा उनले उठाएनन् । त्यसपछि यही प्रश्न मन्त्रालयका सूचना अधिकारी चन्द्रकला ओलीलाई बुझ्न खोज्दा उनी रिसाइन् । यस विषयमा विभागका महानिर्देशक कुमारप्रसाद दाहालसँग कुराकानी गर्दा उनले भ्रामक समाचार फैलाएर आफू र आफ्नो कामलाई असफल पार्न खोजिएको बताएका छन् । उनका अनुसार म्यानपावर अनुगमन र छापा मार्ने काम मन्त्रालयको आदेशमा गर्न दबाब दिइएको भन्ने समाचार केवल हल्ला फिँजाएको उनले बताए ।
उनले भने, ‘कस्ले के कामका लागि यस्तो हल्ला फिँजाएको हो । को रहेछ बाठो भएर लेख्ने, सोध्नु छैन । मलाई यसबारमा एकपटक सोध्नुपर्छ नि, होइन मैले गरिरहेको कामलाई असफल पार्न खोजिएको हो कि क्या हो ?’ २३ माघ ०७६ मा विभागमा बहाली भए यता वैदेशिक क्षेत्रको सुधारका लागि उनी तल्लिन छन् । यही बेला मन्त्रालयले आफू अनुकूल म्यानपावरमा अनुगमन तथा छापा मार्नू भनिएको आदेश सत्य नभएर झूठा भएको भन्दै आफूलाई असफल पार्न खोजिएको उनको भनाइ छ ।
बजार अनुगमन, म्यानपावर संस्थाको लाइसेन्स वितरण र निलम्बन, नवीकरण, शाखा कार्यालय सञ्चालनलगायत सबै जिम्मेवारी विभागसँग छ । तर, पछिल्लो समय विभागले धमाधम बजारमा गैरकानुनी ढंगले सञ्चालन भएका संस्थागत शाखा र व्यक्तिगत ठगीतर्फ धन्दालाई ठीक ठाउँमा ल्याउँदै गर्दा एक्कासि मन्त्री चौधरीले विभागलाई आफूअनुकूल बनाउन खोजेको हल्ला छ ।
-1745656903.jpeg)