काठमाडौं– पुनः प्रवेश (रि–इन्ट्रि) भिसामा फर्किएका श्रमिकले समयअवधि सकिनुअगावै नै साउदी अरब नफर्किएको अवस्थामा तीन वर्षसम्म प्रवेशमा प्रतिबन्ध लगाइएको छ ।
आइतबार वैदेशिक रोजगार विभागले जारी गरेको सूचनामार्फत रि–इन्ट्री भिसामा फर्किएका आप्रवासी श्रमिकहरू भिसाको अवधि सकिनुअगावै काममा नफर्किएको खण्डमा ती कामदारलाई तीन वर्षसम्म साउदी अरब प्रवेश गर्न नपाउने गरी प्रतिबन्ध लगाइएको हो ।
सूचनामा भनिएको छ, ‘साउदी सरकारले रि–इन्ट्री भिसामा स्वदेश गएका कामदारहरू सो भिसाको अवधि सकिनुअगावै काममा नफर्किएमा यस प्रकारका कामदारहरू तीन वर्षसम्म साउदी अरब प्रवेश गर्न प्रतिबन्ध लगाएको छ ।’
तर, जुन कम्पनीबाट रि–इन्ट्री भिसामा गएको हो सोही कम्पनीमा नयाँ भिसामा आउन अनुमति पाएमा उक्त अवधिअगावै आउन बाधा नपर्ने भनि साउदी अरबको अध्यागमन कार्यालयले जनाएको सूचनामा उल्लेख छ । रि–इन्ट्रीको अवधि रहँदै सोही कम्पनीमा नयाँ भिसा पाएमा पनि प्रवेशमा रोक लगाइने सूचनामार्फत् भन्न खोजिएको छ ।
रि–इन्ट्री भिसामार्फत् साउदी जानेहरूले भने स्वास्थ्य प्रोटोकल तथा प्रतिबन्धमा सम्बन्धमा नियमहरू पालना गर्नुपर्ने भनिएको छ । पछिल्लो समय साउदीमा कोरोना संक्रमितको संख्या बढ्न थालेपछि साउदी सरकारले कोरोना संक्रमण कम गर्न स्वास्थ्य प्रोटोकलका अतिरिक्त नियमहरू बनाएको छ ।
रि–इन्ट्री भिसामार्फत व्यापारिक मलहरूमा जाने हरेकले मलमा प्रवेश गर्नुपूर्व साउदी सरकारले उपलब्ध गराएको ‘ट्वाककल्ना एप्स’ अनिवार्य रूपमा आफ्नो मोबाइलमा डाउनलोड गर्नुपर्ने सूचनामा भनिएको छ । डाउनलोड गरिएको एपबाट कोरोना संक्रमण भएका व्यक्तिगको आवागमनको ट्रेसिङ हुने जनाइएको छ ।
यसैगरी ३१ मार्चबाट हवाई, स्थल तथा जलमार्गबाट हुने सम्पूर्ण आवागमन प्रतिबन्ध हटाउने निर्णय गरिए पनि १७ मेसम्मलाई लम्ब्याइएको पनि सूचनामा भनिएको छ । त्यस्तै, विभिन्न २० देशका नागरिकलाई साउदी अरब प्रवेशमा रोक लगाइएको छ ।
साउदी अरब रोक लगाइएको देशहरूमा भारत, पाकिस्तान, अर्जेन्टिना, ब्राजिल, इजिप्ट, फ्रान्स, जर्मनी, इन्डोनेसिया, आयरल्यान्ड, इटली, जापान, लेवनान, पोर्चुगल, दक्षिण अफ्रिका, स्विडेन, स्विटजरल्यान्ड, टर्की, युएइ, बेलायत र अमेरिका रहेका छन् । यी २० देशबाट आप्रवासीहरू, कूटनीतिज्ञ, स्वास्थ्यकर्मी र उनीहरूका परिवारहरू अर्काे व्यवस्था नभएसम्म साउदी अरब प्रवेशमा रोक लगाइएको सूचनामा भनिएको छ ।
