काठमाडौं– सरकारले वैदेशिक रोजगार व्यवसायी (म्यानपावर) हरूलाई शाखा कार्यालय विस्तारका लागि अनुमति दिने तयारी अगाडी बढिनसकेको वैदेशिक रोजगार विभागका महानिर्देशक कुमारप्रसाद दाहालले बताएका छन् ।
बुधबार प्रभाव दैनिकसँगको कुराकानीमा विभागले म्यानपावरलाई शाखाका कार्यालय खोल्न दिने कि नदिने भन्ने विषयमा छलफल मात्र गरिरहेको र शाखा कार्यालय खोल्नै दिने भनेर तयारी भने गरिनसकेको उनले बताए ।
उनले भने, ‘म्यानपावरलाई शाखा कार्यालय खोल्न दिने नदिने भन्ने विषयमा कुनै निर्णय भएको छैन । अहिले केवल यसबारेमा अनौपचारिक छलफलमात्र चलिरहेको छैन । निर्णय नभईकन यसबारे तयारी वा निर्णय भइरहेको छ मिल्दैन ।’
बुधबार म्यानपावर कम्पनीका साझा संस्था नेपाल वैदेशिक रोजगार व्यवसायी संघ नेपालले विभागसँग शाखा कार्यालय खोल्ने सहमती भएको जनाइएको छ । संघले विभागसँग शाखा कार्यालय खोल्ने सहमति भएको भनेर बुँदाको पहिलो नम्बरमा उल्लेख गरेको छ ।
यस विषयमा संघसँग कुनै सहमति नभएको विभागका महानिर्देशक दाहालले प्रभाव दैनिकसँगको कुराकानीमा बताएका छन् । उनका अनुसार संघले ‘शाखा कार्यालय खोल्ने सहमति’ भनेर भोलि शाखा कार्यालय खोल्न नदिइए के गर्ने ? यसकारण सहमति लेख्नुभन्दा अघि विभागले यससम्बन्धि सूचना जारी गरिसक्नुपर्ने उनले बताएका छन् । शाखा कार्यालय खोल्न ऐनले नरोकेको र यस विषयमा तत्काललाई यहीँ भन्न नसकिने उनले बताए ।
त्यसो त म्यानपावरलाई शाखा कार्यालय खोल्न दिने भन्ने कुनै नयाँ खबर भने होइन । यसअघि पनि म्यानपवारलाई शाखा कार्यालय खोल्न अनुमति दिइएको थियो तर, उपत्यकाबाहिर ठगी बढेको र नियमनमा समस्या भएको भन्दै विभागले शाखा खोल्न बन्द गरेको थियो ।
विभागका अनुसार हाल २७ वटा म्यानपावरले शाखा कार्यालय खोल्न अनुमति पाएका छन् । म्यानपावर व्यवसायीले भने कसैले पाउने कसैले नपाउने भन्दै अन्य व्यवसायीले जस्तै आफूले पनि शाखाका कार्यालय खोलन अनुमति पाउनुपर्ने माग राख्दै आएका छन् ।
तर, अहिले अवैध एजेन्ट (दलाल) ले घर भाडामा लिने र शाखा कार्यालय देखाएर ठगी धन्दा चलाएपछि विभागले शाखा कार्यालय खोल्न दिने कि भनेर छलफल चलाएको विभागका महानिर्देशक दाहाल बताउछन् । उनका अनुसार ढिलो चाँडो यस विषयमा उत्तम निर्णय गरेर अघि बढिनेछ ।
उनी भन्छन्, ‘म्यानपावरहरूलाई शाखा खोल्न नदिँदा जिल्लामा झनै दलालहरू सक्रिय भए, ठग्ने मनासयबाटै प्रेरित भएर श्रमिकसँग पैसा उठाउने र विभिन्न बहानामा दुःख दिने गर्ने प्रवृत्ति बढेपछि त्यसलाई रोक्न यस्तो व्यवस्था प्रभावकारी हुनसक्छ कि भन्ने सोचमा छौँ ।’
विभागमा व्यवसायीहरूको घुइँचो
पछिल्लो समय विभागमा म्यानपावर व्यवसायीहरूको घुइँचो नै लाग्न थालेको छ । विभागका एक कर्मचारीका अनुसार दैनिक अनेक समस्या र आग्रह लिएर म्यानपावर व्यवसायीहरू विभागमा आउने गरेका छन् ।
पछिल्लो समय विभागले अनुगमन र छापा हान्न थालेपछि म्यानपावर व्यवसायीहरू त्रसितमात्र होइनन् विभागविरुद्ध नाराबाजीमै उत्रिएका पनि छन् । तर, पनि विभागले उनीहरूको कुनै आवाज नसुनी आफ्नो रफ्तारमा अघि बढिरहेको ती कर्मचारी बताउछन् ।
केही दिनअघि विभागको टोली उपत्यकाबाहिर पुगेर म्यानपावरमा अनुगमनसहित त्रुटी भेटिएका कम्पनीमाथि कारबाही गरिसकेको छ । विभागका ती कर्मचारीका अनुसार अुनगमनमा खटिएको टोलीले प्रत्येक प्रदेशमा कम्तिमा एक–एक वटासम्म शाखा कार्यालय खोल्न दिन सकिने भन्नेबारे पनि सुक्ष्म अध्ययन गरेर फर्किएको छ ।
