काठमाडौं– वैदेशिक रोजगार विभागका महानिर्देशक कुमारप्रसाद दाहालको निर्देशनमा पछिल्लो समय म्यानपावर व्यवसायीहरूको संस्थामा निरन्तर छापा मार्ने क्रमले व्यवसायी आन्दोलित बनेका छन् । अवैध रूपमा सञ्चालन रहेका म्यानपावर व्यवसायीमाथि छापा मार्नुपर्ने बेला विभागले विभिन्न बहाना बनाएर विभागमा दर्ता भएका म्यानपावरहरूमाथि छापा मार्ने क्रम नरोकिएपछि उनीहरू आन्दोलित बन्न पुगेका हुन् ।
हाल विभागमा दैनिकजसो म्यानपावर व्यवसायीको छाता संगठन नेपाल वैदेशिक रोजगार व्यवसायी संघको टोली विभाग पुगेर महानिर्देशकलाई अनावश्यक रूपमा इजाजतप्राप्तवाला संस्थाहरूलाई दुःख नदिन आग्रह गर्ने गरेको छ । तर, महानिर्देशक दाहाल भने म्यानपावर व्यवसायीमाथि छापा मार्ने र कारबाही गर्ने क्रम नरोकिने बताउँछन् ।
उनी भन्छन्, ‘छापा मार्ने क्रम रोकिने छैन । अझ निरन्तर दिइनेछ । मैले विभागमा छिर्दै गर्दा वाचा गरेको थिएँ– वैदेशिक क्षेत्रमा पूर्ण रूपमा शुद्धीकरण गर्नेछु ।’ उनका अनुसार विभागमा उनको प्रवेशपश्चात पाँचदर्जन म्यानपावरमा छापा मारेर कारबाहीको दायरामा ल्याइएको छ ।
विभागका महानिर्देशक दाहालले म्यानपावर व्यवसायीको कार्यालयहरूमा प्रायःजसो दैनिक रूपमा विभागबाट टोली खटाएर छापा मार्ने क्रम नरोकिने बताउँछन् । तर, उनको यो कदमले इजाजतप्राप्त संस्था म्यानपावर व्यवसायीलाई घात पुग्ने संघमा आबद्ध व्यवसायीहरूको भनाइ रहेको छ ।
त्यसो त संघमा आबद्ध म्यानपावर व्यवसायीहरूले २१ बुँदे माग राख्दै तत्काल छापा मार्ने क्रम बन्द गर्न भनी महानिर्देशकलाई मागपत्र दिइसकेका छन् । मागपत्रमा आफूहरूले ल्याएको कामदारको माग पत्रअनुसार अन्तर्वार्ता दिँदा विभागले अनावश्यक दुःख दिएको भनिएको छ ।
पछिल्लो समय विभिन्न समूहहरूले शुद्धीकरणको नाममा म्यानपावर व्यावसायीहरूमाथि आक्रमण हुने क्रम बढेपछि व्यावसायी नै असुरक्षित बनेको उनीहरू बताउँछन् । सरकारी निकायलाई खबर नगरी आफैँ हिन्दी चलचित्रको दृष्यलाई मात दिलाउने गरी करोडौँ धरौटी राखेर सञ्चालन गरेको व्यावसायमाथि धावा बोल्ने कामको पनि व्यावसायीले विरोध गर्न थालेका छन् ।
आफूहरू गलत भएको भए वैदेशिक रोजगार विभागले कारबाही गर्ने निकाय हुँदाहुँदै अधिकारकर्मीका नाममा हुलका हुल बाँधेर व्यावसायीमाथि जाइलाग्ने प्रवृत्तिले व्यावसायी हतोत्साही भएको पनि उनीहरूको भनाइ छ ।
-1752335779.jpg)
