दोहा– कतारस्थित नेपाली दूताबासमा राहदानी थुप्रिएको छ । दूताबासमा विभिन्न मितिमा राहदानीका लागि निवेदन दिएकाहरूको राहदानी बनेको लामो समय हुँदा पनि दाबी गर्न नआएपछि दूताबासमै थुप्रिएको हो ।
दूताबासका अनुसार हालसम्म ७८६ जना नेपालीका राहदानी थुप्रिएको छ । राहदानी थुप्रिएपछि दूताबासले सूचना जारी गर्दै सन् २०११ देखि २०१७ सम्म विभिन्न मितिमा दूताबासमा राहदानीका लागि आवेदन दिएका आवेदकहरूको मेसिन रिडेबल राहदानी तयार भई आइसकेकाले सम्पर्क गर्न भनेको छ ।
हालसम्म पनि सम्बन्धित व्यक्तिले उक्त राहदानीहरू बुझ्न नआकाले दूताबासले सूचना प्रकाशित गरेको छ । तीन महिनाभित्र पुरानो राहदानी, रसिद वा आङ्खनो परिचय खुल्ने कागजातसहित दूताबासमा सम्पर्क गर्न सूचनामा भनिएको छ ।
तोकिएको समयभित्र दाबी नभएका राहदानीहरू राहदानी विभाग, काठमाडौं पठाइनेसमेत सूचनामा छ । यस सम्बन्धमा कुनै जिज्ञासा भएमा दूताबासको राहदानी शाखाको इमेलमा सम्पर्क गर्न सूचनामा भनिएको छ ।
उता, मलेसियास्थित नेपाली दूताबासले पनि सूचना जारी गर्दै १ हजार ९ सय ७४ जना नेपालीको राहदानी नेपाली दूताबासमै थन्किएको जनाएको छ । सन् २०१३ देखि २०१८ सम्ममा बनेका र हालसम्म बुझी नलगेका राहदानीहरू सम्बन्धित राहदानी बाहकले सूचना प्रकाशन भएको मितिले ३ महिनाभित्र लिइसक्नु पर्ने दूताबासले जनाएको छ ।
साथै, नयाँ राहदानी बनाउन आउनेहरू अथवा आफूसँग राहदानी नभई घर फर्कनका लागि ट्राभल डकुमेन्ट बनाउन आउनेहरूले पनि आङ्खनो पुरानो राहदानी दूताबासमा छ कि यकिन गरेर मात्र नयाँ राहदानी वा ट्राभल डकुमेन्ट बनाउन आवेदन दिनसमेत दूताबासले अनुरोध गरेको छ ।
