काठमाडौं– कतार प्रहरीमा नेपाली राख्ने कुराले नेपालीलाई उत्साही बनाए पनि यसमा चलेको जालझेलका कारण नेपाललाई नै बद्नाम बनाएको छ । कतारले आगामी विश्वकप फुटबल प्रतियोगिताका लागि समेत करिब १२ हजार नेपालीलाई सुरक्षाकर्मीमा प्रवेश दिने भएपछि यसैमा अत्यन्तै ठूलो खेल मच्चिएको थियो ।
कतारमा सुरक्षाकर्मीमा लैजाने भएपछि खासगरी केही म्यानपावर कम्पनीहरूले सिन्डिकेटको प्रयास गरे । यहि क्रममा १७ वटा म्यानपावर कम्पनीहरूको नाम नै सार्वजनिक गरेर खैलाबैला मच्चाइएको थियो । यहि १७ वटा म्यानपावरको नाममाथि विभिन्न टीकाटिप्पणी भइरहेको मौका छोपी केही म्यानपावर कम्पनी र कतार राजदूताबासका कर्मचारीले कतार प्रहरीमा लैजान अन्तर्वार्ता लिएको भनेर वैदेशिक रोजगार विभागले छापा मात्र हानेन । ती म्यानपावर कम्पनीहरूलाई ६÷६ महिनासम्म निलम्बन नै गरेको छ ।
नेपालमा अन्तर्वार्ता लिन असम्भव भएपछि कतिपय युवाहरूलाई केही बिचौलियाहरूले भारतको सिलगुढीमा अन्तर्वार्ता लिएर छान्ने काम भएको भनेर नेपालमा समाचार पनि आएको थियो । यसबारे प्रभाव दैनिकले समाचार पनि सम्प्रेषण भएको थियो ।
यो कुरालाई विभागले इन्कार गरेको भए पनि अहिले नेपाली युवाहरूलाई भारतको विमानस्थल प्रयोग गरेर कतार पु¥याइएको समाचार बाहिर आएको छ । स्रोतका अनुसार व्यक्तिगत भिसामा कतार पठाउने काम भइरहेको छ । कतार प्रहरीकै लागि दुई सय जनाको भिसा आएको र अहिले करिब सय जना युवाहरू कतारमा पु¥याइसकिएको बताइन्छ । ती दुई सय जनाले प्रतिव्यक्ति १२ हजारका दरले मेडिकल खर्च पनि संकलन गरिसकिएको स्रोतको दाबी छ । एक व्यक्ति बराबर १५ लाख रूपैयाँसम्म लिएर भिसा ल्याइएको स्रोतको दाबी छ ।
माथिल्लो तहको मिलेमतोमा नै म्यानपावर कम्पनीले ती युवाहरूलाई कतार पु¥याएको समाचार बाहिर आएको छ । यसमा खासगरी सरकारले जिटुजी (सरकार–सरकारबीच) प्रणालीबाट कामदार आपूर्ति गराउन चाहेको भए पनि कतार राजदूताबासको चलखेलमा केही म्यानपावर कम्पनीहरूले युवाहरूलाई भारत भएर कतार पठाएको स्रोतको दाबी छ ।
यता, कतार प्रहरीका लागि स्विकृति नै नलिई अन्तर्वार्ता सञ्चालन गरेको भन्दै सरकारले एसओएस म्यानपावर, होप इन्टरनेसनल र डिडी ह्युमन रिसोर्सेस प्रालि ६÷६ महिनाका लागि निलम्बनमा परेका छन् । यो समाचार तयार पार्दै गर्दा एसओएस म्यानपावरको निलम्बन भने मन्त्रीस्तरीय निर्णयबाट फुकुवा भएको समाचार आएको छ ।
अन्तर्वार्ता लिँदै गर्दा थाहा पाएर विभागले छापा मारेको भए पनि अहिले युवाहरू कतार नै कसरी पुगे ? यो प्रश्नले निक्कै ठूलो हलचल ल्याएको छ । कतार पुगेका युवाहरूले नै आफूहरू १५ लाख तिरेर व्यक्तिगत भिसामा कतार आएको र आफूहरूलाई कतार प्रहरीमा भर्ना गर्ने निश्चित भएको बताएका छन् । यसबारे डिडी ह्युमन रिसोर्सेस प्रालिका सञ्चालक बेनीबहादुर कार्कीले आफ्नो कम्पनीमा विभिन्न तालिम लिँदै गरेका युवाहरूलाई आधार बनाएर निलम्बन गर्ने तर युवाहरू कतार नै पुग्दा पनि सरकार मौन बसेको भन्दै प्रभावसँग आक्रोश पोखेका छन् ।
-1752335779.jpg)
