काठमाडौं– संयुक्त अरब इमिरेट्स दुबई (युएई) मा ४१ जना नेपालीले जेल जीवन भोगिरहेको युएईस्थित नेपाली दूताबासले जनाएको छ । पछिल्लो समय कोरोना संक्रमण कम भएसँगै केही दिनअघि युएईमा जेल जीवन भोगिरहेकाहरूको अवस्थाबारे अध्ययन गर्न पुगेको दूताबासले हाल जेलमा ३७ पुरुष र ४ जना महिला गरी ४१ जनाले जेल जीवन बिताइरहेको जनाएको हो ।
दूताबासका अनुसार प्रायजसो पुरुष नेपालीहरू जेल जेल पर्नुका कारण जाँडरक्सी, झैझगडा, लागुऔषध ओसारपसार, जथाभावी यौन क्रियाकलाप नै रहेको देखिएको छ । यसअघिको अनुसन्धानमा जेल पर्नुका अधिकांश कारणहरू जाँड रक्सी सेवन, झैझगडापछि हत्यालगायत रहँदै आएको पनि दूताबासले जनाएको छ ।
यसैगरी कतिपयले कानुनविपरीत यौन गतिविधिको मामिलामा जेल परेको दूताबासले जनाएको छ । यद्यपि, त्यस्ता खालका घटनाहरू हुन नदिन दूताबासले विशेष निगरानी अपनाएको पनि जनाइएको छ ।
अनुन्धानका लागि युएईको कारागारमा पुगेको टोलीले केही समयअघि एक महिला र दुई पुरुषलाई नेपाल फर्काएको पनि दूताबासले जनाएको छ । युएईको जेलमा रहेकाहरूलाई दूताबासका प्रतिनिधिले भेटेर उनीहरूको पछिल्लो अवस्थाबारे पनि थप अध्ययन अनुसन्धानसमेत गरेको दूताबासले जनाएको छ ।
केही दिनअघि युएईको अबिरमा रहेको सेन्ट्रल जेलमा रहेकाहरूको अवस्था बुझ्न युएईका लागि नेपाली राजदूत कृष्णप्रसाद ढकाल, श्रम काउन्सेलर निर्मला थापा, स्थानीय जनसम्पर्क अधिकृत (पिआरओ) इरफान आलम पुगेका थिए ।
जेलामा रहेकाहरूको अवस्था अध्ययनपश्चात स्वदेश फिर्तिका लागि आवश्यक कानुनी सहयोग तथा कागजी प्रक्रियाबारे सहजीकरण पनि गरिएको जनाइएको छ । प्रत्येक वर्ष दुईपटक जेलमा रहेकाहरूको अवस्थाबारे अध्ययन अनुसन्धान गर्ने योजना भए पनि सन् २०२० मा कोरोनाका संक्रमणका कारण असम्भव हुन गएको पनि दूताबासले भनेको छ ।
दूताबासका अनुसार यस वर्ष भने युएईमा रहेका ८ वटा कारागारमा पुगेर के कारण उनीहरूले जेल जीवन भोगेका हुन् भनेर जानकारी लिइने पनि दूताबासले जनाएको छ । अनुसन्धानका क्रममा उनीहरूमाथिको मुद्दा र आरोपबारे जानकारी लिइने दूताबासले जनाएको छ ।
जेल जीवन भोगिरहेका उनीहरूलाई लागेको आरोप वा मुद्दाका विषयमा दूताबासका तर्फबाट कानुनी सहजीकरणको बाटो अपनाइने र कानुनी सजाय पूरा गरेपश्चात फर्किनेलाई हवाइ टिकटको व्यवस्था गरिने पनि दूताबासले भनेको छ ।
