दोहा– कतारका लागि नेपाली राजदूत डा.नारदनाथ भारद्वाजले विभिन्न पेसा, व्यवसायमा आवद्ध कतारमा रहेका सबै नेपाली नागरिकहरू आफ्नो पेसाप्रति इमान्दार रहन अनुरोध गरेका छन् ।
नेपाली दूताबासले आयोजना गरेको श्रमिक सुरक्षा र सचेतनामूलक अन्तक्र्रियात्मक कार्यक्रम बोल्दै राजदूत डा.भारद्वाजले स्थानीय संस्कृति, धर्म र प्रचलित कानुन प्रतिकूल नहुने गरी सजक रही आफ्नो पेसाप्रति इमानदार रहन आग्रह गरे ।
नेपाली दिदीबहिनीहरूलाई नेपालको इज्जत र आफ्नो स्वाभिमान तथा आत्मसम्मानलाई मनमा राखेर कार्य गर्नसमेत अनुरोध गरेका छन् । वैदेशिक रोजगारीका सिलसिलामा कतारमा आउनु अघि र आएपश्चात गर्न हुने र गर्न नहुने कामहरु र कतारको कानुनका विषयमा प्रस्तुतीकरण गरिएको थियो ।
कोभिड–१९ को संक्रमणको विद्यमान परिस्थितिमा कतार सरकारद्वारा अवलम्बन गरिएका सुरक्षा र सतर्कताका उपायहरूको पालना गर्दै सबैले थप सजग र सुरक्षित हुनुपर्ने विषयलाई समेत कार्यक्रममा समावेश गरिएको थियो । यसका साथै, दूताबासले जारी गर्ने राहदानी र ट्राभल डकुमेन्टलगायत कन्सुलर सेवाका बारेका संक्षिप्त प्रस्तुतीकरण गरी यस विषयमा सहभागीहरूले उठान गरेका विविध प्रश्नहरूको जवाफ दिइएको थियो ।
कार्यक्रममको उद्देश्यबारे द्वितीय सचिव भुवन भट्ट, श्रमसँग सम्बन्धित बिषयमा श्रम काउन्सेलर कृष्णप्रसाद खनाल, राहदानी तथा ट्राभल डकुमेन्ट सम्बन्धी सेवाको वारेमा द्वितीय सचिव श्रचा भट्टराईले प्रस्तुत गरेका थियो भने द्वितीय सचिव प्रवीण भट्टराईले कार्यक्रमको संचालन गरेका थिए ।
सहभागीहरुले उठाएका जिज्ञासाहरूको नियोग उपप्रमुख लक्ष्मण खनालले जबाफ दिएका थिए । कार्यक्रममा दोहास्थित अल डल्ला कम्पनीमा कार्यरत ३० जना नेपाली महिला दिदीबहिनीहरुको उपस्थिति रहेको थियो ।
-1752335779.jpg)
