दोहा– गैरआवासीय नेपाली संघ (एनआरएनए) ले नेपालमा कोभिड १९ विरुद्धको खोप भित्राउनका लागि पहल सुरु गरेको छ ।
संघ अन्तर्गतको स्वास्थ्य समितिले बुधबार विश्व स्वास्थ्य संगठन साउथ एसियाका वरिष्ठ खोप विज्ञ तथा स्वास्थ्य अधिकृत डा.सुधीर खनालसँग नेपालमा कोभिडविरुद्धको खोप लैजान सकिने सम्भवना र चुनौतिको बारेमा छलफल गरेको हो ।
भर्चुअल माध्यमबाट आयोजित कार्यक्रममा संघका महासचिव डा.हेमराज शर्माले गैरआवासीय नेपाली संघले विज्ञहरूको रायको आधारमा खोपका लागि आवश्यक सहयोग गर्न तयार रहेको बताए । उनले नेपाल सरकारसँगको सहकार्यमा कोभिड १९ विरुद्धको खोप किन्न संघ इच्छुक रहेको उल्लेख गरे ।
छलफलमा बोल्दै संघको स्वास्थ्य समितिका संयोजक डा.सञ्जीव सापकोटाले नेपाल सरकारले नेपालमा खोप लैजान प्रयाप्त तयारी नगरेको अवस्थामा विदेशमा बस्ने नेपालीहरूले देशमा खोप भित्राउन ठूलो भूमिका निर्वाह गर्न सकिने बताए ।
कार्यक्रममा बोल्दै डा.खनालले नेपालले ल्याउने खोप डब्लुएचओबाट मान्यता प्राप्त हुनु पर्नेमा जोड दिए । तत्कालका लागि बेलायत, जर्मनीलगायत मुलुकले उत्पादन गरेका खोप नेपाल ल्याउन सकिनेबारे छलफल र तयारी भइरहेको उनको भनाइ थियो ।
उनले भारतले बनाएको खोप सहजता र सुलभता एवं अन्यको तुलनामा सस्तो भएका कारणले नेपालका लागि उपयुक्त हुने बताएका छन् । नेपालमा एउटै उत्पादनकर्ताको खोप भित्र्याउनसमेत नेपाल सरकारलाई सुझाव दिए । उनले नेपालको ७२ प्रतिशत जनसंख्यालाई खोप दिनका लागि ५४ अर्ब रूपैयाँ लाग्ने उल्लेख गरेका छन् । भारत, चीन र रसियाबाट नेपालका लागि खोप ल्याउन सकिने उनले बताए । भारत सरकारलाई नेपाललाई आवश्यक मात्रामा पूरा हुने गरी खोप उपलब्ध गराउन आग्रह गर्न सकिने बताए ।
डा. खनालले नेपालमा खोप खरिद गर्नको लागि आवश्यक ऐन तथा कानुनहरू बाधक रहेको समेत बताए । छलफलमा संघका कोरियाका डा.देवी बस्नेतले साउथ कोरिया, चीनलगायत देशसँग सहकार्य गरेर नेपाल सरकारले अघि बढ्न सकिने बताए ।
एनआरएन अमेरिकाका अध्यक्ष सुनील शाहले नेपालमा खोप पठाउन व्यक्तिगत तथा संस्थागत रूपमा सहयोग गरेर अघि बढ्न सकिने बताए । अन्तरक्रिया कार्यक्रममा बोल्ने वक्ताहरूले गैरआवासीय नेपालीहरूले नेपाल सरकारलाई सहयोग गर्दा आर्थिक सहयोग नगरेर सिधै खोप उपलब्ध गराउँदा उचित हुने सुझाव दिएका थिए ।
-1745656903.jpeg)