सोझासादालाई चर्को मार, बिचौलिया र कर्मचारी मोटाउँदै
काठमाडौं– वैदेशिक रोजगार विभाग, ताहाचलको व्यक्तिगत श्रम स्विकृति शाखामा कर्मचारी र बिचौलियाको सेटिङमा दिनदहाडै लेनदेन चलेको प्रमाण फेला परेको छ । सेवाग्राहीले विभागमा बुधबार सेवा लिन जाँदा कर्मचारीले अनेकौँ अनावश्यक थप कागजात मागेको तर त्यहि कागजात बिचौलियाले लगेपछि पाँच मिनेटमा काम गरेर फर्केपछि सेटिङमा दिनदहाडै लेनदेन चलेको प्रमाण फेला परेको हो ।
बुधबार मात्र प्रभाव दैनिकको विशेष टोली ताहचल पुग्दै गर्दा एक कर्मचारीले केही आफ्नो बिचौलिया राखेर ती व्यक्तिमार्फत आउनू भनी सम्पर्क गराएका थिए । बुधबार सेवा लिन गएका केही युवाहरूलाई ती बिचौलियाहरूले जनही रु २५ हजार रूपैयाँ लाग्ने, ५ हजार रूपैयाँ आफूहरू र कर्मचारीहरूलाई तोकेर नै २० हजार रूपैयाँ दिनुपर्ने भनेर निष्फिक्री भन्दै गरेको थिए ।
नोबेल कोभिड–१९ का कारणले देशमा बेरोजगारले चरम रूप लिइरहेको बेला युवायुवतीहरू आफ्नै बलबुताले व्यक्तिगत तवरबाट विदेश जाने प्रयास गर्दा उनीहरूलाई विभागले नै दुःख दिनु आफैँ दुभाग्य हो । स्वदेशबाट नै ठगिन थालिएपछि उनीहरूलाई विदेशी भूमिमा ठगिनुलाई अन्याथ नसोचे पनि हुने भएको छ । गन्तव्यमा नपुगी ठगिएको मानसिक तनाव लिएर विदेशिनेहरूको विदेशमा हालत के हुने हो ? निक्कै सोच्नुपर्ने भएको छ ।
‘हामीजस्ता सोझासादा र गरिबहरूले दुःख, कष्ट गरेर श्रम स्विकृतिका लागि ताहाचल पुग्दा विभागकै व्यक्तिगत शाखाका केही कर्मचारीहरूले दिनदहाडै रकम लेनदेन गर्दा कस्को चित्त दुख्दैन ?’ ती पीडितले भने, ‘बिचौलियाहरूले लगेमा काम बन्छ, हामीहरू गएमा कागज मिलेन भन्दै दोस्रोपटक कागजमा आँखै लगाउँदैनन् ।’ सेवाग्राहीले यत्तिको दुःख पाउने मात्र नभएर चित्त दुखाउँदा सम्बन्धित निकायहरू भने मूकदर्शक बनिरहेको पीडितले बताएका छन् ।
उनीहरूका अनुसार बिचौलियालाई पैसा दिएपछि उनीहरूले कर्मचारीलाई नाम टिपाउँछन् र पाँचै मिनेटमा काम सकेर पठाइदिने गरेका छन् । केही दिन अघिसम्म टेबल मुनी र कार्यालयबाहिर मात्र लेनदेन गरेको भए पनि कोभिडसँगै विभागमा लेनदेनको खेती निक्कै फस्टाएको त्यहाँकै कतिपय श्रम प्रतिनिधिहरूले पनि नाम नबताउने सर्तमा भन्दै आएका छन् । उनीहरूकै भाषामा ‘कागजपत्र मिलेकै भए पनि थप रकम माग गर्नु त यहाँको पुरानै चलन हो ।’
स्रोतका अनुसार वैदेशिक रोजगार ताहाचलका व्यक्तिगत शाखाका कर्मचारीहरू शाखा अधिकृत हरिकृष्ण बुढाथोकी, ना.सु. देवेन्द्र ढकाल र कम्प्युटर अपरेटर बाबुराम पौडेयलले सेवाग्राही प्रत्यक्ष आफैँ जाँदा सबै कागजात प्रक्रिया पूरा गर्दा पनि बखेडा झिक्ने काम गर्दै आएका छन् । कागजात पुगेको भए पनि अनेकौँ बखेडा झिकेर सोझासादा सेवाग्राहीको काम नगरी दिने गरेका छन् । यत्ति मात्र होइन, कि उनीहरूले बिचौलियाको नाम नै उल्लेख गरेर भेटेर कागजात मिलाउनू भन्छन् तर ती व्यक्तिहरूलाई भेट्नेबित्तिकै कागजात नभएर पैसाकै कुरा गर्ने गरेका छन् ।
स्रोतका अनुसार व्यक्तिगत शाखाका कर्मचारीहरू शाखा अधिकृत बुढाथोकी, ना.सु. ढकाल र कम्प्युटर अपरेटर पौडेयलको अहिले रजगज चल्दै आएको छ । उनीहरूको मूल्य अहिले ह्वात्तै बढेपछि त्यसको मार सेवाग्राहीमा परेको बिचौलियाहरूले नै भन्दै आएका छन् ।
पीडितहरूका अनुसार उनीहरूले सिधै बिचौलियालाई भेट त भन्दैनन् तर उनीहरूले कागजात पुगे÷नपुगेको भनेर फलानोलाई जाँच गराएर आउनु भनेर सेवाग्राहीलाई सिधै भन्दै आएका छन् । जब उनीहरूले दिएको नाम गरेको व्यक्तिलाई भेटिन्छ, तब उनले यत्ति पैसा भए म गरिदिन्छु, अन्यथा गर्नै सकिँदैन भनेर भन्ने गरेको पीडितहरूले बताएका छन् ।
बिचौलियाको भर नपरेर आफैँ सेवा लिन जाँदा अनेकौँ अनावश्यक थप कागजात माग्ने तर बिचौलियाले नाम मात्र टिपाइदिएकालाई पाँच मिनेटमा काम सकेर पठाइदिने गरेको भए पनि सम्बन्धित निकायले ध्यान नदिएको देखिन्छ ।
हुन त, विभागमा यस्ता घटना नयाँ र नौलो भने पक्कै होइन । विगतमा यसै कार्यालयमा अख्तियार दुरूपयोग अनुसन्धान आयोगले सय जनाभन्दा धेरै कर्मचारीलाई रंगेहात पक्राउ गरेको यथार्थ प्रमाणहरू पनि छन् । अहिले सरकार सञ्चालक दलमा भएको आन्तारिक विवादका कारण सरकार परिवर्तन हुने हो कि भनेर हल्ला चल्दै गरेपछि विभागका कर्मचारीले यहि मौका छोप्दै आएको हल्ला विभागमा चल्दै आएका छन् ।
-1752335779.jpg)
