लाखौँ श्रमिकहरु लाभान्वित
काठमाडौं– सरकारले आगामी साताबाट अनलाइनबाटै श्रमिकले पुनः श्रम स्विकृति (रि–इन्ट्री) सुविधा लिन पाउने व्यवस्था गरेसँगै विदेशबाटै श्रम स्विकृति नवीकरण गर्न पाइने भएको छ । अनलाइनमार्फत विदेशमा रहेका नेपाली श्रमिकले पुनः श्रम स्विकृति नवीकरण गर्न मिल्ने भएपछि वैदेशिक रोजगारीका क्रममा विदेशमा रहेका लाखौँ श्रमिक लाभान्वित हुने बधबार वैदेशिक रोजगार विभागका सूचना अधिकारी टिकामणि न्यौपानेले बताए ।
‘अब, विगतका दिनझैँ श्रम अवधि सकिएर वैधानिकताका लागि पुनः फर्किएर श्रम स्विकृति नवीकरण गर्नुपर्ने बाध्यता हटेको छ । विदेशमा रहेका श्रमिकले यो सुविधा दुई पटकसम्म पाउनु हुनेछ,’ उनले भने, ‘एकपटक श्रम स्विकृति लिएकाहरूले संसारको जुनसुकै कुनामा बसेर पनि श्रमको रि–इन्ट्री अनलाइनबाटै गर्न सक्नेछन् ।’
सूचना अधिकारी न्यौपानेका अनुसार सरकारले अनलाइनबाटै पुनः श्रम स्विकृति नवीकरण गर्ने सुविधा ल्याएपछि श्रम स्विकृति नवीकरणका लागि ताहाचल कार्यालय नै पुग्नेपर्ने झन्झट हटेको छ । विभागबाट श्रम स्विकृति लिई श्रम गर्न अनुमति पाएका संसारभरका नेपाली श्रमिकका लागि यो नौलो जानकारी पनि रहेको उनले बताए ।
विदेशबाटै पुनः श्रम स्विकृति नवीकरण गर्नका लागि वैदेशिक रोजगार विभागले तोकेका पेमेन्ट गेट–वेमार्फत बिमा र वैदेशिक रोजगर कल्याणकारी कोषको रकम तिर्नुपर्ने सूचना अधिकारी न्यौपाने बताएका छन् । उनका अनुसार यसका लागि विभागले विभिन्न बिमा कम्पनी र पेमेन्ट गेट–वेसँग सम्झौता गरेको छ ।
यस्तै, आइएमई पे, ई–सेवाजस्ता गेट–वेबाट पनि श्रमिकले तोकिएका शुल्क भुक्तानी गर्न सक्ने उनले बताएका छन् । विभागले तोकिएअनुरूप अनलाइन गेट–वेमार्फत शुल्क भुक्तानी गरेपछि अनलाइन प्रणालीमार्फत श्रमिककै इमेलमा श्रम स्विकृति नवीकरण भएको प्रमाणसहितको जानकारी दिइने उनले बताए ।
उनका अनुसार नेपाल ऐन संशोधन गर्न बनेको विधेयकमार्फत सरकारले वैदेशिक रोजगार ऐन संशोधन गरेर दुई पटकसम्म कामदारलाई विदेशबाटै श्रम रि–इन्ट्रीको सुविधा दिन सकिने व्यवस्था रहेको छ । उक्त व्यवस्थाबमोजिम विदेशमा भिसा अवधि सकिएकाहरूले थप विदेशमा बस्न चाहेको खण्डमा अनलाइनमार्फत नै पुनः श्रम स्विकृति (रि–इन्ट्री) गर्न सक्ने उनले बताए ।
निवर्तमान श्रम, रोजगार तथा सामाजिक सुरक्षा मन्त्री गोकर्ण बिष्टले यो व्यवस्था लागू गर्न योजना अघि बढाएका थिए । तैपनि उनी असफल भएका थिए । तर, हाल उक्त योजनालाई पूर्णता दिइने सरकारले अन्तिम योजना बनाएको जनाइएको छ ।
सूचना अधिकारी न्यौपानेका अनुसार यो व्यवस्थापछि श्रम स्विकृति नवीकरणमा मात्र सहज नभएर श्रम स्विकृति नवीकरण नगरेका कारण समस्या पर्दा वैदेशिक रोजगार कल्याणकारी कोषबाट सुविधा पनि नपाउने अवस्थाको अन्त्य हुनेछ ।
