काठमाडौं– कोभिड–१९ का कारण केही समयदेखि रोकिएको श्रम स्विकृति वैदेशिक रोजगार कार्यालय ताहाचल, काठमाडौंले आइतबारदेखि सुरु गर्ने भएको छ । शुक्रबार सूचनामार्फत आइतबारदेखि दैनिक ३ सयका दरले टोकन वितरण गरेर पुनः श्रम स्विकृति नवीकरण सुरु भएको काठमाडौं कार्यालयले जनाएको हो ।
सेवाग्राहीको चापलाई मध्यनजगर गरेर आइतबारदेखि दैनिक ३ सयका दरले टोकन वितरण गरिएको काठमाडौं कार्यालयले जनाएको छ । सेवाग्राहीबाट ‘आज मेरो टिकट छ’ भनी टोकन अगाडि सार्न भनी अनुरोध गरिएकोमा उक्त मर्कालाई मध्यनजर गर्न सम्बन्धित शाखा वा वैदेशिक रोजगार विभाग तयार रहेको जनाइएको छ ।
यद्यपि, यसअघि सम्बन्धित शाखा वा विभागले यसरी काम गर्दै आएको भए पनि कार्यसम्पादनमा प्रश्न उब्जेको सूचनामा उल्लेख छ । जारी सूचनामा भनिएको छ, ‘शाखा वा विभागसँग समन्वय गरी टिकट, पिसिआर रिपोर्ट देखाउन लगाई र भिसा समाप्त हुनेको हकमा सो हेरेर टोकन एक दिनपूर्व वा भोलिपल्ट बिदा भए अर्काे दिन ११ बजेसम्मको भए अघिल्लो दिन पारदर्शी रुपमा सारिदिने गरिएकामा यस सम्बन्धमा कार्यालयको कार्यसम्पादनमा प्रश्न उठ्न जाने अवस्था रहेको छ ।’
श्रम स्विकृति नलिई टिकट आदि व्यवस्था नगर्न र त्यसरी टिकट लिई श्रम स्विकृति हुन नसकेमा कार्यालय जवाफदेही नहुने जनाइएको भए पनि यो क्रम निरन्तर भइरहेको सूचनामार्फत जनाइएको छ । यसअघि विभागले श्रम स्विकृति नलिई टिकट व्यवस्था र टिकट लिइ श्रम स्विकृति हुन नसकेमा कार्यालय जवाफदेही नहुने सूचना विभागले जारी गर्दै आएको छ ।
वैदेशिक रोजगारीमा जाँदा अनिवार्य रुपमा श्रम स्विकृति लिनुपर्ने र कसैको श्रम स्विकृतिको म्याद भए उडान गर्ने दिन कम्तिमा ९१ दिन हुनुपर्ने पनि सूचनामार्फत जनाइएको छ । यस्तै, श्रम स्विकृति नवीकरणका सन्दर्भमा कुनै पनि बाहना वा व्यहोराबाट टोकन अगाडि सार्ने कार्य पूर्ण रुपमा बन्देज लगाइएको जनाइएको छ ।
उता, श्रम, रोजगार तथा सामाजिक सुरक्षा मन्त्रायलले शुक्रबार जारी गरेको साप्ताहिक विवरणमा १ सय २६ श्रमिक आपूर्तिकर्ता नवीकरण गरिएको छ भने ५ सय ८५ गैरनेपाली नागरिकको श्रम स्विकृति नवीकरण गरिएको छ ।
यसैगरी, कोभिड–१९ को महामारीबीच २ हजार ८ सय २२ जनालाई विदेश जान नयाँ श्रम स्विकृति प्रदान गरिएको पनि साप्ताहिक विवरणमा उल्लेख छ । मन्त्रालयद्वारा जारी विवरणमा १८ हजार ६ सय १३ जनाले पुन श्रम स्विकृति पाएको भनिएको छ ।
