काठमाडौं– म्यानपावर व्यवसायीहरुको छाता संगठन नेपाल वैदेशिक रोजगार व्यवसायी संघले सरकारको स्विकृतिबिना कतार पुलिसका लागि गोप्य रुपमा अन्तर्वार्ता लिने तीन म्यानपावरसँग स्पष्टीकरण सोध्न माग गरेको छ । बुधबार संघका कार्यसमिति तथा विभिन्न संघमा आबद्ध म्यानपावर व्यवसायीहरुले एस.ओ.एस म्यानपावर, डि.डि. ह्युमन रिसोर्स र होप इन्टरनेसनललाई स्पष्टीरण सोध्न श्रम, रोजगार तथा सामाजिक सुरक्षा मन्त्रालय र वैदेशिक रोजगार विभागसँग माग गरेका हुन् ।
बुधबार जारी गरिएको प्रेस विज्ञप्तिको १ नम्बर बुँदामा कतारको सिन्डिकेटको बारेमा छानबिन गर्न र गैरकानुनी ढंगले गोप्य रुपले अन्तरर्बार्ता लिने ती कम्पनीहरुमाथि कडा कारबाही गर्न माग पनि माग गरिएको छ ।
यसैगरी २ नम्बर बुँदामा विभागले छापा मार्ने क्रममा कतार दूतावासको सवारीसाधन प्रयोग गरिएको पाइएको हुँदा सो सम्बन्धमा परराष्ट्र मन्त्रालय र राष्ट्रिय मानवअधिकार आयोगमार्फत कतारी मानवअधिकार आयोगमा पत्राचार गरी बुझ्न पनि माग गरिएको विज्ञप्तिमा उल्लेख छ ।
गत सोमबार र मंगलबार स्विकृतिबिना कतार पुलिसका लागि भनी गोप्य रुपमा अन्तर्वार्ता लिँदै गरेको अवस्थामा एस.ओ.एस म्यानपावर, डि.डि ह्युमन रिसोर्स र होप इन्टरनेसनलमा विभागले छापा मारेको थियो । त्यसलगत्तै बुधबार दिउँसो बसेको संघमा बसेको म्यानपावर व्यवसायीको आकस्मिक भेलाले स्विकृतिबिना अन्तर्वार्ता लिने कम्पनीमाथि छानबिन गर्न, स्पष्टीकरण सोध्न तथा आवश्यक कारबाहीका लागि माग गर्ने निर्णय गरेको संघका सचिव मेघनाथ भुर्तेलले जानकारी दिएका छन् ।
सचिव भुर्तेलका अनुसार ८ सय ५४ म्यानपावर व्यवसायीमाथि घात गर्ने जुनसुकै व्यवसायीलाई कानुनी दायरामा ल्याइने र आवश्यक कारबाही गरिनेछ । ‘हावा नआई पात हल्लिँदैन । यसकारण यस्तो अवस्थामा म्यानपावर व्यवसायीहरु चुप लागेर बस्ने अवस्था छैन,’ उनले भने, ‘८ सय ५४ म्यानपावर व्यवसायीमाथि घात गर्नेलाई कानुनी दायरा र आवश्यक कारबाही गरि छाडिनेछ ।’
गैरकानुनी काम गरिएको छैन– अध्यक्ष गुरुङ
बुधबार प्रभाव दैनिकसँगको कुराकानीमा एस.ओ. एस म्यानपावरका सञ्चालक तथा कतार भिसा सेन्टर (क्युभिसी) का अध्यक्ष हेमबहादुर गुरुङले भने सोमबार विभागले कार्यालयमा छापा मारे पनि आफूहरुले कुनै पनि गैरकानुनी काम नगरेको बताएका छन् ।
कतार रोजगारका लागि भनेर युवाहरु भने कार्यालयमा लाइनबद्ध भएको तर कार्यलयबाट तत्काल कामका लागि पठाउन सरकारले अनुमति नदिएको भनेर जानकारी गराइरहेको बेला विभागले छापा मारेको उनले बताए ।
बाहिर कार्यालय बन्द र कार्यालयको कारोबार बन्द भएको भन्ने हल्ला मात्र चलेको पनि उनले बताएका छन् । ‘सोमबार विभागले कार्यालयमा एक्कासि छापा मारेको हो तर, कार्यालय बन्द र कारोबारमा कुनै पनि बन्देज भएको छैन,’ उनले भने, ‘र, विभागले हामीबाट त्यस्तो कुनै फायलहरु पनि जफत गरेको छैन ।’
उनका अनुसार सँगै काम गर्ने कार्यालय साथीको बुबाको देहान्तले बुधबार कार्यालय बन्द गरिएको हो । बिहीबारदेखि पुनः कार्यालय खुला हुने पनि उनले बताएका छन् । साथै, कतार सिन्डिकेटको विषयमा यसअघि नै संघलाई आफू सिन्डिकेटविरुद्ध रहेको उनले स्पष्टीकरण दिएका छन् ।
उनीसँगै डि.डि र होप इन्टरनेसनल म्यानपावर कम्पनीले पनि आफूहरु उक्त सिन्डिकेटविरुद्ध रहेको मौखिक रुपमा भनेका छन् । यद्यपि, लिखित रुपमा संघ र सरकारलाई दिए÷नदिएको भन्ने विषयमा बताइएको छैन ।
धमाधम छापा मार्दै विभाग
उता, विभागले भने ३ म्यानपावर व्यवसायीले कतार रोजगारीका लागि कागजातहरु मिलाउँदै गरेको अवस्थामा फेला पारेपछि अन्य म्यानपावर कम्पनीमाथिको छापा तीव्र बनाएको छ । सोमबार सुटुक्कै कतार कामदार पठाउन भनी कागजात मिलाउँदै गरेको अवस्थामा ३ म्यानपावरलाई भेट्टाएपछि थप अनुसन्धानसँगै छापा मार्ने काम थालिएको विभागले जनाएको छ ।
विभागका महानिर्देशक कुमारप्रसाद दाहालका अनुसार सोमबार एस.ओ.एस, डि.डि. र होप इन्टरनेसनल कम्पनीले कतार कामदार पठाउन भनी कागजातहरु मिलाउँदै गर्दा छापा मारिएको हो । उनले भने, ‘हामीले पत्याएको थिएनौँ तर, सोमबार अप्रत्यासित रुपमा ३ म्यानपावर व्यवसायीहरुले कतार कामदार पठाउन भनी कागजातहरु मिलाइरहेको अवस्थामा हामीले छापा मारेका हौँ ।’
यसैगरी बुधबार सामाखुसीस्थित शिखर म्यानपावरले गोप्य रुपमा कतार कामदार पठाउन लागेको भनेर सूचना पाएपछि विभागले छापा मारे पनि त्यस्तो खालको कुनै पनि कागजातहरु फेला नपरेको उनले बताएका छन् । यसअघि १६ म्यानपावर व्यवसायीहरुले सुटुक्कै कतार कामदार पठाउन लागेको भन्ने हावा फैलाइएको भनिए पनि अहिले त्यो साँचो हो कि भन्ने प्रमाणहरु फेला पर्न थालेको पनि उनले बताएका छन् ।
