काठमाडौं– म्यानपावर व्यवसायीका साझा संस्था नेपाल वैदेशिक रोजगार व्यवसायी संघले १६ म्यानपावर व्यवसायीसँग प्रतिबद्धता पत्र पठाउन माग गरेको छ । बिहीबार ८ सय ५४ व्यवसायीलाई पाखा लगाएर १६ म्यानपावर व्यवसायीले मात्र कामदार कतार पठाउन पाउने भन्ने सूचना साँचो वा झूठो के हो भन्ने विषयमा यथार्थ प्रतिबद्धता पत्र पठाउन संघले माग गरेको हो ।
संघका सचिव मेघनाथ भुर्तेलका अनुसार नाम प्रकाशन भएकाहरूले संस्थाको लेटर हेडमा वास्तविकता के हो भनेर प्रतिवद्धता पत्र लेखेर संघलाई पठाउन माग गरिएको छ । उनले भने, ‘बिहीबार कतार कामदार पठाउने अनुमति पाएका भनिएका १६ म्यानपावर व्यवसायीलार्य वास्तविकता के हो भनेर पत्र काटिएको छ । जसमध्ये हालसम्म ३ जनाले वास्तविकताबारे स्पष्ट पार्दै प्रतिबद्धता पत्र पठाइसक्नुभएको छ ।’
संघले १६ जना सबैलाई व्यक्तिगत रूपमा सम्पर्क गर्दा नाम प्रकाशन भएका व्यवसायीहरूले त्यसमा आफूहरूको संलग्नता नरहेको र चरित्र हत्या गर्न खोजिएको बताएको सचिव भुर्तेलले बताएका छन् । आफ्नो चरित्र हत्या गरिएको भन्दै कतार भिसा सेन्टर (क्युभिसी) का सञ्चालक तथा एसओएसका म्यानपावर व्यवसायी हेम गुरुङ, व्यवसायी महेन्द्र चौलागाई“ र व्यवसायी वाइबी राईले संघमा प्रतिबद्धता पठाइसकेको पनि उनले बताए ।
‘सिन्डिकेट’ निम्ताएर सुटुक्कै कतार कामदार पठाउन आफूहरूको कुनै संलग्नता नरहेको र चरित्रहत्या गर्न खोजिएको भन्दै सिन्डिकेट निम्ताउनेविरुद्ध आफूहरू सधै“ रहेको उनीहरूले संघलाई पठाएको प्रतिबद्धता पत्रमा उल्लेख भएको सचिव भुर्तेलले जानकारी दिएका छन् । साथै, उनीहरूले बाहिर अनर्गल रूपमा आफूहरूबारे नकारात्मक समाचार फैलाइएकोप्रति दुःख व्यक्त गरेको पनि उनले बताए ।
सचिव भुर्तेलका अनुसार कामदार जाने सबै देशमा संघले संयोजक तोकेको छ । मलेसियाका लागि भुर्तेल आफैँ संयोजक रहेका छन् भने कतारका लागि प्रथम उपाध्यक्ष, दुबईका लागि द्वितीय उपाध्यक्ष, कुवेतका लागि तृतीय उपाध्यक्ष र साउदीका लागि महासचिव रहने व्यवस्था छ । यसरी हरेक देशमा संयोजक चयन गरिएको छ ।
कतार कामदार पठाउने सन्दर्भमा प्रभाव दैनिकले थप कुराकानी गर्न खोज्दा संघका प्रथम उपाध्यक्ष कमल तामाङले आफू उपत्यकाबाहिर जाँदै गरेकाले फर्किएपछि कुरा गर्ने बताएका छन् । यद्यपि, नाम प्रकाशन भएका सबै व्यवसायीहरूलाई वास्तविकता के हो भनेर संघमा पठाउन भनिसकेको उनले बताए । यस विषयमा सोमबार ८ सय ५४ व्यवसायीस“ग राय लिएर आन्दोलनमा जाने कि के गर्ने भन्नेमा निक्र्योल हुने सचिव भुर्तेलले बताएका छन् ।
यसै सन्दर्भमा रहेर वैदेशिक रोजगार व्यवसायीको पनि धारणा प्रस्तुत गरिएको छ । उनीहरू सबैले कतार कामदार पठाउन भिसा दिने सिन्डिकेटविरुद्ध जस्तोसुकै मूल्य चुकाउने बताएका छन् ।
सिन्डिकेटविरुद्ध उत्रिइन्छ– संयोजक भान्तना
प्रगतिशिल वैदेशिक रोजगार व्यवसायी मञ्च नेपालका संयोजक रामप्रसाद भान्तनाले श्रम, रोजगार तथा सामाजिक सुरक्षा मन्त्रीसँगेको भेट गरेर यस्तो सिन्डिकेटविरुद्ध उत्रिने भनिएको बताएका छन् । मन्त्री रामेश्वर राय यादवले आफू सिन्डिकेटविरुद्ध रहेको र त्यस्तो काम हुन नदिनेमा विश्वस्त हुन भनेको संयोजक भान्तनाले बताए ।
साथै, मन्त्री यादवसँगको भेटमा नेपालस्थित कतार दूताबासले यस विषयमा प्रष्ट प्रतिक्रिया दिनुपर्छ भनेर भनिएको संयोजक भान्तनाले बताएका छन् । उनले भने, ‘व्यवसायीको समूह मिल्ने अनि एक व्यवसायीले अर्काे व्यवसायीलाई मर्कामा पार्ने काम जायज होइन । यसमा सरकार मुख्यतः चनाखो नहुँदा समस्या निम्तिएको छ ।’
धरौटी राख्ने कुनै व्यवसायीलाई काखा कसैलाई पाखा गर्न नुहने पनि संयोजक भान्तनाले बताएका छन् । उनका अनुसार पहिला क्युभिसीलाई मन्त्रालयबाट अनुमति दिइएन पछि परराष्ट्र मन्त्रालयबाट अनुमति दिइयो र अहिले क्युभिसीबाटै कतार कामदार पठाउन अनुमति दिने योजना अघि सार्नु व्यवसायीलाई आत्मघाती हो ।
आन्दोलनमा उत्रिनेछौँ– अध्यक्ष ढकाल
नेपाल लोकतान्त्रिक बैदेशिक राजगार व्यवसायी एसोसिएसनका अध्यक्ष नरेन्द्र ढकालले संस्था बन्द गरेरै सिन्डिकेटविरुद्ध आन्दोलनमा उत्रिने बताएका छन् । उनले भने, ‘८ सय ५४ संस्थाको लेटर हेडमै यस्तो सिन्डिकेटविरुद्ध एकबद्धता जाहेर गरिनेछ । र, सबै व्यबसायी संस्था बन्द गरेर सिन्डिकेटबिरुद्ध आन्दोलनमा उत्रने छौँ ।’ इजरायलको सन्दर्भमा पनि सरकार एक्लौटी ढंगले अघि बढ्ने र अहिले कोरोना महामारीमा यस्तो सिन्डिकेट लागू गर्न नदिइने अध्यक्ष ढकालले चेतावनी दिएका छन् ।
टाउको काटेर जेल गइन्छ– अध्यक्ष पाण्डे
वैदेशिक रोजगार एकता समाजका अध्यक्ष हरिबहादुर पाण्डेले सिन्डिकेट निम्ताउनेको टाउको काटेर बरु जेल जाने भनी आक्रोश प्रकट गरेका छन् । ८ सय ५४ व्यवसायीमाथि घात गरेर १६ जनाले मात्रै रजाइ गर्न खोजेमा उनीहरूको टाउको काटेर बरु जेल नै जाने उनले बताए ।
उनले भने, ‘२ करोड, ४ करोड र ६ करोड धरौटी राख्ने व्यवसायीमध्ये १६ जनाले मात्रै कतार पठाउन पाउने ? यदि त्यसो हो भने त्यस्तो व्यक्तिको टाउको काटिनेछ । श्रीमतीले लगाएको छड्के तिलहरी बेचेको पैसा धरौटी राखेर व्यवसायीले संस्था चलाएका छन् । यो हेक्का होस् ।’ साथै, उनले सरकारलाई नालायकपनको संज्ञा दिएका छन् ।
फ्रि भिसा फ्रि टिकट अनि दश हजारमा पठाउन आदेश दिने सरकार आफैँ दलाली भएर इजरायल कामदार पठाउन खोज्ने सरकारले अहिले आएर वैदेशिक रोजगारीको महत्व बुझेको पनि उनले बताएका छन् । आज वैदेशिक रोजगारी बन्द हुँदा सडकदेखि आकाशमा उडान खाली हु“दा सरकारले चाल पाएको पनि उनले बताए ।
त्यस्तै, व्यवसायीहरूको छाता संगठन सुतेको पनि उनले आरोप लगाएका छन् । उनले भने, ‘व्यवसायीलाई के भएको छ थाहा संघलाई थाहा छैन । मस्तसँग संघ सुतेको बेला जातको नाममा, धर्मका नाममा खोलेका संस्थाहरू उसैगरी सुतेका छन् । र, बाहिर केही पहु“चवाला व्यवसायीले सरकारलाई फनफनी घुमाइरहेका छन् ।’
-1745656903.jpeg)