काठमाडौं– बिहीबार १६ म्यानपावर व्यवसायीलाई मात्रै सुटुक्कै कतार कामदार पठाउन भिसा दिने सूचना बाहिरिएसँगै यस विषयमा सत्य तथ्य बुझ्नका लागि संघले आइतबार ती व्यवसायीलाई कार्यालयमा बोलाएर छलफल गर्ने भएको छ ।
शनिबार प्रभाव दैनिकसँगको कुराकानीमा अन्य व्यवसायीलाई बेवास्ता गरी १६ व्यवसायीलाई मात्र कतार कामदार पठाउन भिसा दिने सूचना बाहिर कसरी चुहियो भन्ने सन्दर्भमा ती व्यवसायीलाई आइतबार संघमा बोलाइएको संघका सचिव मेघनाथ भुर्तेलले जानकारी दिए ।
कोभिड–१९ महामारीमा कतार कामदार पठाउन भनी नेपालस्थित कतार भिसा सेन्टर (क्युभिसी) का सञ्चालक तथा एसओसएस म्यानपावरका अध्यक्ष हेम गुरुङ र व्यवसायी महेन्द्र चौलागाईँको सक्रियतामा उक्त काम गरिएको अन्य व्यवसायीको आशंका रहेको छ । तर, गुरुङ र चौलागाईँ दुवैले ‘सिन्डिकेट’ विरुद्ध आफूहरूको रहेकाले दुर्भाग्यपूर्ण उक्त सूचना प्रकाशन भएको बताएको सचिव भुर्तेलले बताए ।
सचिवल भुर्तेलले भने, ‘संघसँग उहाँहरू बिहीबार नै सम्पर्कमा आएर यस विषयमा माफी माग्नुभएको छ । अध्यक्ष गुरुङ र व्यवसायी चौलागाईँले त्यस्ता सिन्डिकेटविरुद्ध आफूहरू रहेकाले त्यस्तो सूचना प्रकाशन हुनुमा दुर्भाग्य ठानेको बताउनुभएको छ ।’ साथै, यस विषयमा दुवै जनाले बिहीबार सिन्डिकेटविरुद्ध रहेको धारणा सामाजिक सञ्जालमार्फत जानकारी गराएको पनि उनले बताए ।
सचिव भुर्तेलका अनुसार गुरुङले भने आफूसँगको कुराकानीमा १६ जनाको लिस्टमा आफ्नो नाम कसरी राखियो भन्नेमा अचम्ममा परेको बताएका छन् । क्युभिसीले कतार जाने कामदारको भिसासम्बन्धि सहजीकरण मात्र गर्ने तर, बाहिर अनेकथरि हल्ला चलाएर आफ्नो बद्नाम गर्न खोजिएको गुरुङले बताएको सचिव भुर्तेलले जानकारी गराए ।
त्यस्तै, गरी म्यानपावर चौलागाईँले पनि कुराकानीका क्रममा आफ्नो नाम प्रकाशन भएकोमा आपत्ति जनाएको सचिव भुर्तेलले जानकारी दिएका छन् । साथै, अचानक यस्तो महामारीमा कतार कामदार पठाउन भनी सूचना प्रकाशन भएकोमा चौलागाईँले दुर्भाग्य ठानेको भुर्तेलले बताए ।
आइतबार संघले सबैलाई संघमा बोलाएको र छलफलका क्रममा ‘सिन्डिकेट’ निम्ताउने काम भएको रहेछ भने त्यसको विरुद्ध अघि बढिने सचिव भुर्तेलले बताएका छन् । ‘८ सय ५४ व्यवसायीमध्ये कसरी १६ जनामात्रैले कतार कामदार पठाउन सक्छन् ? के १६ जना मात्रै व्यवसायी म्यानपावर व्यवसायी हुन् ?,’ सचिव भुर्तेलले प्रश्न गर्दै भने, ‘यदि ८ सय ५४ जना म्यानपावर व्यवसायी हुन् भने कसरी गोप्य रूपमा सूचना प्रकाशन भयो भन्ने विविध विषयमा आइतबार संघमा बहस हुनेछ ।’
