काठमाडौं– नेपाल र ओमान सरकारबीच नेपाली तथा ओमानी कूटनीतिक, विशेष, सेवाकालीन तथा सरकारी राहदानीबाहकलाई एक अर्काको देशमा प्रवेशाज्ञा छुटसम्बन्धी सम्झौता भएको छ ।
सोमबार ओमानको मस्कटस्थित नेपाली राजदूतावासले ओमानको परराष्ट्र मन्त्रालयमा सम्झौता कार्यक्रम आयोजना गरी एक अर्काको देशमा प्रवेशाज्ञा छुटसम्बन्धी सम्झौतामा हस्ताक्षर भएको जनाएको हो ।
ओमानका लागि नेपाली राजदूत शर्मिला पराजुली ढकाल र ओमानका तर्फबाट परराष्ट्र सचिव मोहम्मद नासिर विन मोहम्मद अल वहेबीले सम्झौता पत्रमा हस्ताक्षर गरेका छन् ।
सम्झौता पत्रमा उल्लेख भएअनुसार कूटनीतिक, विशेष, सेवाकालीन तथा सरकारी राहदानीबाहकले एकअर्काका देशमा प्रत्येकपटक प्रवेश गरेका मितिदेखि ९० दिनसम्म प्रवेशाज्ञा नलिइकन प्रवेश गर्न, ट्रान्जिटका रूपमा रहन, बस्न तथा त्यहाँबाट प्रस्थान गर्न सक्नेछन् ।
नेपाल–ओमान सरकारबीचमा भएको सम्झौता पत्रमा भनिएको छ, ‘राहदानीबाहक दुबै देशका नागरिकले एक अर्काको देशमा प्रत्येकपटक प्रवेश गरेको मितिदेखि ९० दिनसम्म प्रवेशाज्ञा नलिइकन प्रवेश ट्रान्जिटको रूपमा रहन, बस्न त्यहाँबाट प्रस्थान गर्न सक्नेछन् ।’
सम्झौतापछि नेपाल–ओमानबीच हुने द्विपक्षीय औपचारिक भ्रमण, ट्रान्जिट भ्रमणलगायत अन्य गतिविधि बढाउन सहयोग पुग्ने ओमानस्थित नेपाली दूतावासले जनाएको छ । त्यसैगरी पछिल्लो समय ओमान अन्तरराष्ट्रिय विमानस्थल व्यस्त ट्रान्जिटका रूपमा विकास भइरहेका सन्दर्भमा श्रमलगायत अन्य विविध गतिविधिका लागि त्यहाँ हुने भ्रमणमा समेत सो सम्झौताले सहजीकरण गर्नेसमेत जनाइएको छ ।
हस्ताक्षर कार्यक्रममा दुवै देशका प्रतिनिधिले प्रवेशाज्ञामा सहजीकरण भएसँगै दुवै देशले आपसी सम्बन्धका विविध आयामलाई थप गतिशील र सक्रिय बनाउनुपर्नेमा जोड दिएका छन् ।
साथै, कोभिड–१९ का कारण पनि देशहरूले अर्थतन्त्रलाई चलायमान बनाउन रचनात्मक तथा नवप्रवर्तनात्मक क्रियाकलापमा जोड दिनुपर्नेमा समेत जोड दिनुपर्ने विचार साटासाट भएको जनाइएको छ ।
यसैगरी छलफलमा द्विपक्षीय लगानी प्रबर्द्बन, पर्यटन प्रवद्र्धन एवं आपसी हितका विषयहरू पनि समावेश भएको सम्झौता पत्रमा उल्लेख छ ।
