दोहा– गैरआवासीय नेपाली संघअन्तर्गत सातौँ मध्यपूर्व क्षेत्रीय बैठकको उद्घाटन गर्दै परराष्ट्र मन्त्री प्रदीप ज्ञवालीले विदेशमा सीप सिकेकाहरूलाई नेपालमा सम्मानजनक पुनस्र्थापना गर्ने बताएका छन् ।
उनले कृषिको आधुनिकीकरण गरी नयाँ प्रविधिद्वारा नेपाललाई आत्मनिर्भर बनाउन अगाडि बढ्ने प्रतिद्धतता ब्यक्त गरेका थिए ।
कोरोनाको बेला मध्यपूर्वका एनआरएनकर्मीहरूले आङ्खनो ज्यान जोखिममा राखेर पीडामा परेका नेपालीहरूलाई खाद्यान्न वितरण, स्वदेश फिर्तीजस्ता मानवीय कार्य गरेकामा हार्दिक आभारसहित धन्यवाद ज्ञापनसमेत गरेका थिए ।
मन्त्री ज्ञवालीले श्रम सम्बन्धलाई बदलेर पर्यटन, लगानी तथा निर्यातमा बिस्तार गर्न कूटनीतिक पहल थालिसकिएको बताएका छन् ।
मध्यपूर्वमा रहेका झन्डै १५ लाख नेपालीहरूले पठाएको रेमिट्यान्सले देशको अर्थतन्त्रलाई धानेको हुँदा मध्यपूर्वलाई नेपाल सरकारले पनि प्राथमिकतामा हेरेको उनको भनाइ थियो ।
‘गैरआवासीय नेपालीहरूको आजको आवश्यकता, स्वास्थ सुरक्षा, सहज फिर्ती एवं रोजगारी, सामाजिक पुनस्थापनाको सुनिश्चिता’ मुख्य नारा रहेको बैठकले मध्यपूर्वमा कार्यरत नेपाली कामदारहरूको समस्या, समाधान र मध्यपूर्वको देशहरूसँग कूटनीतिक सम्बन्ध, कोरोना भाइरसका कारण मध्यपूर्वबाट नेपाल फर्किएका युवाहरूको व्यवस्थापन पक्षमा नेपाल सरकार र गैरआवसीय नेपाली संघले खेल्नुपर्ने भूमिका र व्यवस्थाबारे छलफल थियो ।
कार्यक्रमको पहिलो चरणका छलफलका विषयहरूमा प्रवासमा अलपत्र परेका नेपालीहरूको उद्धार, स्वदेश फिर्ती, स्वदेशमा पुनस्र्थापन तथा रोजगारको ग्यारेन्टी, विदेशमा पुनः श्रम स्विकृती, वैदेशिक रोजगार कल्याणकारी कोषको उचित व्यवस्थापन र सदुपयोग, श्रमिकका जीवन रक्षालगायत गम्भीर विषयमा छलफल भएको थियो ।
प्रवासमा महिलाहरूले भोग्नु परेका पीडा, छिमेकी राष्ट्रलगायत तेस्रो मुलुक हुँदै विदेशमा नेपाली महिलाहरू बेचिनु पर्ने बाध्यता, महिला हिंसा, अन्याय, अत्याचार तथा सामाजिक विभेद्उपर समाजमा भइरहेका असामान्य घटनाक्रमको निराकरण सम्बन्धी र कोरोनाले प्रवासमा महिला श्रमिकमाथि पर्न गएको असर र यसको रोकथाम, उद्धार र पुनस्र्थापन सम्बन्धी घनिभूत छलफल गरी कार्यक्रमको समापन गरिएको थियो ।
भेलामा परराष्ट्रमन्त्री, वैदेशिक रोजगार विभाग, श्रम मन्त्री तथा मन्त्रालय, नेपाल पर्यटन बोर्ड, वैदेशिक रोजगार कल्याणकारी कोष, विभिन्न राष्ट्रका महामहिम राजदूत तथा महिला अधिकारी, महिला पूर्वपराष्ट्रमन्त्री सुजाता कोइराला, महिला सांसद रामकुमारी झाँक्री, पौरखी नेपालका अध्यक्ष मन्जु गुरुङ तथा मध्यपूर्व तथा विभिन्न राष्ट्रका कूटनीतिक नियोगका महिला प्रतिनिधिहरूलगायत महिला संयोजक साथै एनआरएन पदाधिकारीहरूको उपस्थिति रहेको थियो ।
गैरआवासीय नेपाली संघ, राष्ट्रिय समन्वय परिषद् कतारको अतिथ्यतामा कतारको दोहाबाट अनलाइन प्रविधिको प्रयोग गरिएको थियो ।
