काठमाडौं– सरकारले बिहीबारदेखि उपत्यकामा निषेधाज्ञा हटाएसँगै श्रम कार्यालय खुला गरेर १८ जनालाई नयाँ श्रम स्विकृति प्रदान गरेको वैदेशिक रोजगार विभागले जनाएको छ ।
कुन कुन देशका लागि नयाँ श्रम स्विकृति लिए भन्नेमा श्रम कार्यालयबाट यकिन जानकारी नआएको तर, श्रम स्विकृति लिने १८ जना सबै पुरुष रहेको विभागका सूचना अधिकारी टिकामणि न्योपानेले बताए ।
निषेधाज्ञा खुकुलो भएको र अन्तर्राष्ट्रिय उडान तीव्र भएसँगै नयाँ श्रम स्विकृति लिएकाहरू रोजगारीमा जाने पनि उनले बताएका छन् । उनले भने, ‘लकडाउन खुकुलो भएसँगै कार्यालय पनि खुला भएको छ । र, नयाँ श्रम स्विकृति लिएकाहरू पनि अन्तर्राष्ट्रिय तीव्र भएसँगै रोजगारीमा जान पाउने छन् ।’
सूचना अधिकारी न्योपानेका अनुसार पुनः श्रम स्विकृति (रिन्यु) तर्फ ११ चैतदेखि बिहीबारसम्म ६ हजार १ सय १५ जनाले स्विकृति लिएका छन् । पुनः श्रम स्विकृतितर्फ पुरुषतर्फ ८७ र महिलातर्फ ३ जना महिलाले श्रम स्विकृति लिएका छन् ।
यस्तै, वैधानिकीकरणतर्फ (अध्ययन भिसा, पर्यटन भिसामा पुनः विदेश जान चाहेकाहरू) ५ जना पुरुषले श्रम स्विकृति लिएको उनले बताएका छन् । पुनः श्रम स्विकृतितर्फ ९०, नयाँ श्रम स्विकृतितर्फ १८ जना र वैधानिकीकरणतर्फ ५ जनाले श्रम स्विकृति लिएको उनले बताए ।
कुन कुन देशतर्फ कति जना श्रमिक जान चाहेका हुन् भन्ने विषयमा विभागमा यकिन विवरण नआएको र संख्या विवरणमात्र आएको उनले बताएका छन् ।
उता, श्रम रोजगार कार्यालय, ताहाचलले १ भदौदेखि बिहीबारसम्म ९ सय २३ जनाले श्रम स्विकृति लिएको जनाएको छ । ताहाचाल कार्यालयका अनुसार ८ सय ५४ पुरुष र ६९ महिलाले श्रम स्विकृति लिएका छन् ।
युएईका लागि सबैभन्दा बढी ५ सय ११ जनाले श्रम स्विकृति लिएको ताहाचल कार्यालयले जनाएको छ । ताहाचल कार्यालयका अनुसार युएईका लागि ४ सय ७० पुरुष र ४१ जना महिलाले श्रम स्विकृति लिएका छन् । युएईपछि कतारका लागि १ सय ५५ जना पुरुष र १ महिलाले गरी १ सय ५६ जनाले श्रम स्विकृति लिएको कार्यालयले जनाएको छ ।
कतारपछि रोमानियाका लागि ४७ जना पुरुष र १ महिला गरी १ सय ४८ जनाले, बहराईनका लागि ३८ पुरुष र ४ महिला गरी ४२ जनाले, ओमानका लागि २९ जना पुरुषले, साउदी अरबका लागि २६ जना पुरुषले, मलेसियाका लागि १९ जना पुरुष र १ जना महिला गरी २० जनाले श्रम स्विकृति लिएको ताहाचल कार्यालयले जनाएको छ ।
त्यस्तै, माल्दिभ्सका लागि १७ पुरुष र १ महिला गरी १८ जनाले, जापानका लागि १० पुरुष र १ महिलाले, कुवेतका लागि ८ पुरुष र ३ महिला गरी ११ जनाले, साइप्रसका लागि १ जना पुरुष र ७ जना महिला गरी ८ जनाले श्रम स्विकृति लिएको ताहाचल कार्यालयले जनाएको छ ।
यसैगरी पोल्यान्डका लागि ६ पुरुष र १ महिला गरी ७ जनाले, टर्कीका लागि १ जना पुरुष र ५ जना महिला गरी ६ जनाले, ब्रुनाइका लागि ५ जना पुरुषले, क्यानडाका लागि ३ जना पुरुष र १ जना महिला गरी ४ जनाले, चेक रिपब्लिकाका लागि १ जना पुरुष र २ जना महिला गरी ३ जना र अफगानिस्तानका लागि ३ जना पुरुषले श्रम स्विकृति लिएको ताहाचल कार्यालयले जनाएको छ ।
सबैभन्दा कम बेल्जियमका लागि १ जना पुरुष, बर्मुडाका १ जना पुरुष, फिनल्यान्डका लागि १ जना पुरुष, मालिका लागि १ जना पुरुष, माल्टाका लागि १ जना पुरुषले श्रम स्विकृति लिएको ताहाचल कार्यालयले जनाएको छ । यस्तै, नाइजेरियाका लागि १ जना पुरुष, सोमालियाका लागि १ जना पुरुष, थाइल्यान्डका लागि १ जना महिला, रसियाका लागि १ जना पुरुष र अमेरिकामा १ जना पुरुषले श्रम स्विकृति लिएको पनि ताहाचल कार्यालयले जनाएको छ ।
