दोहा– पछिल्लो केही दिन यता विदेशमा रोजगारी गुमाएर अलपत्र पर्ने नेपालीहरूको क्रम बढ्न थालेको छ । कोरोनाका कारणले कम्पनी बन्द भएर बेरोजगार बन्दै गर्दा नेपाल सरकारले पनि अन्तराष्ट्रिय हवाइ उडानमा रोक लगाएपछि साउदी अरबमा मात्र दुई जना नेपाली अलपत्र परेका हुन् ।
नेपाल जानका लागि टिकट खरिद गर्न पनि चार्टर्ड उडानको तीन गुणा बढी मूल्य सरकारले तोकेपछि किन्न नसकेर कतिपय साउदीका सडकहरूमा बिचल्ली भएर बसेका छन् । त्यसो त नेपाल जान चाहनेहरू पनि पिसिआर परीक्षण गर्न सर्वसुलभ नभएकाले उनीहरूको परीक्षण भएको छैन । परीक्षण नगरी नेपाल जाने हो भने काठमाडौंमा होटल क्वारेन्टाइन बस्नु पर्ने हुन्छ, जुन अत्यन्तै महँगो छ । काठमाडौंमा होटल क्वारेन्टाइन बस्नका लागि एक दिनको नै दशौँ हजार रूपैयाँ तिर्नुपर्ने हुन्छ ।
यता, विदेशमा कोरोनालगायत अन्य विभिन्न कारणले रोजगारी गुमाएर लामो समयसम्म कोठामा बस्नु परेकाले धेरै नेपालीमा मानसिक विचलन आउन थालेको बताइन्छ ।
पछिल्लो समय खासगरी साउदी अरबमा नेपाली कामदारहरू अलपत्र पर्ने क्रम बढेको छ । साउदी अरवको रियादमा थप दुई सय नेपाली कामदार अलपत्र परेको समाचार छ । रियादस्थित अल मवारिद सप्लाई कम्पनीमा कार्यरत नेपालीहरूले आफूहरू समस्यामा परेको भन्दै उद्धारको अपिल गरेका छन् ।
उनीहरूका अनुसार ७ महिनादेखि कोठामा बसेको तथा भिसा सकिएर एक्जिट लागेको समेत दुई महिना भसकेको तर, कम्पनीले घर पठाउनेबारे कुनै वास्ता नगरेको बताएका छन् ।
साउदी अरबको रियादस्थित ती दुई कम्पनीमा काम गर्ने नेपालीहरूले आफूहरूको उद्धारमा दूताबासले पनि आवश्यक मद्दत नगरेको गुनासो गरेका छन् । कम्पनीले ७ महिनादेखि आफूहरूलाई तलब सुविधा उपलब्ध नगराएको सोही कम्पनीमा कार्यरत सुमन नेपालले बताएका छन् ।
कम्पनीले टिकट महँगो भएको र साउदीस्थित नेपाली दूताबाससँग चार्टर ङ्खलाइट अनुमति मागे पनि नदिएको कम्पनीले आफूहरूलाई बताउने गरेको उनले बताए । उनीहरूका अनुसार उडान महँगो भएको भनेपछि घरबाट पैसा मगाएर आधा पैसासमेत सबैले कम्पनी बुझाएको तर, पनि अहिलेसम्म कम्पनी पठाउने कुनै नगरेको बताएका छन् ।
खाना राम्रो नभएको कारण धेरै साथीहरू बिरामी परेको जनाउँदै अहिलेसम्म कसैले पनि उपचार नपाएको उनीहरूको भनाइ छ । रोजगारी गुमाएको पीडा त छँदै छ, अर्काेतिर सम्बन्धित दूताबासले पनि बेवास्ता गर्दा पीडामाथि पीडा थपिएको उनीहरू बताउँछन् ।
यता, साउदीको समास्को कम्पनीमा करिब १२ सय नेपाली कामदार महिनौँदेखि स्वदेश फिर्तीको पर्खाइमा विमान कुरिरहेकाहरूले स्वदेश फर्कन नपाएपछि, सरकारविरुद्ध नारा लगाएका थिए । नाराबाजी गरेको बारे दूताबासमा बुझदा प्रमुख समस्या भनेकै उडान संख्या कम भएको कारण उनीहरू स्वदेश फर्किन नपाएर आक्रोशित भएको प्रतिक्रिया दिएको छ ।
साउदीका लागि नेपाली राजदूत महेन्द्रप्रसाद सिंह राजपुतले स्वदेश फर्कन नपाएर आक्रोशित हुनु स्वाभाविक रहेको जनाउँदै आगामी १८ सेप्टेम्बरमा केहीलाई पठाइने तथा बाँकी रहेकालाई पनि क्रमशः पठाउने तयारी भइरहेकाले यो समस्या चाँडै हल हुने बताए ।
-1745656903.jpeg)