साउदीमा नेपाली अलपत्र
दोहा– रोजगारीका लागि विभिन्न समयमा साउदी अरबको पुगेका १२ सय नेपाली कामदार अलपत्र परेपछि उनीहरूले सरकार र नेपाली दूताबासविरुद्ध आक्रमक नारा लगाएका छन् ।
कोभिड–१९ का कारण ६ महिनादेखि रोजगार गुमाएकाहरूले तलब सुविधा नपाएपछि घरबाट पैसा मगाएर स्वदेश फर्कन्छौँ, विमान चार्टर्ड गरिरिदन नेपाली दूताबाससँग बारम्बार अनुरोध गर्दा पनि दूताबासले कुनै चासो नदेखाएपछि उनीहरू सरकार र नेपाली दूताबासविरुद्ध आक्रमक नारा लगाएका हुन् ।
[video width="224" height="400" mp4="http://prabhabonline.com/wp-content/uploads/2020/09/Saudi.mp4"][/video]
यता, चार्टर उडानको स्विकृति दिने नागरिक उड्डययन मन्त्रालयले भने अत्यन्तै महँगोमा (चार्टर्डभन्दा पनि तीन गुणा बढी) टिकट बेचिरहेको छ । मन्त्रालयले विदेशी विमानहरूलाई हतपत उडानको अनुमति पनि दिन मानिरहेको छैन । सरकारले हिमालयन एयरलाइन्सलाई मात्र एकोहोरो उडान भर्ने अनुमति दिनुले पनि विमान कम्पनी र सरकारी संयन्त्रबीच केही न केही कालो कर्तुत हुन सक्ने शंका गरिएको छ ।
विदेशमा अलपत्र नेपालीको उद्धार गरिएको भनेर सरकारले भनिरहँदा वास्तवमा यो उद्धार नभएर महँगो टिकट किन्न सक्नेलाई मात्र नेपाल ल्याउनुको अर्थ सरकारले कालोबजारी गरिरहेको खाडीमा अलपत्र परेका युवाहरूले बताइरहेका छन् । सरकारले अहिलेसम्म कोही कसैलाई उद्धार नगरेको बरु महँगो टिकट किन्नेलाई मात्र नेपाल पु¥याउने उद्देश्यका साथ सरकारले व्यापार गरेको देखिन्छ ।
साउदी अरबको रियादस्थित समास्को सप्लाई कम्पनीमा काम गर्ने कामदारहरूको करार अवधि सकिएको झन्डै ७ महिना लाग्दासमेत कम्पनीले पनि चासो नदेखाएको पीडितहरूले बताएका छन् । आफूहरूको समस्याबारे साउदीस्थित नेपाली दूताबासमा पुगी सहयोग माग्दा पनि नसुनेको भन्दै पीडित नेपाली श्रमिकहरूले नेपाल सरकार तथा नेपाली दूताबासविरुद्ध चर्को नाराबाजी गरेका छन् ।
आफूहरूको आवाज नसुनेपछि ९ सय पुरुष तथा ३ सय नेपाली महिला नेपालीले सरकारविरुद्ध साउदीको सडकमा आन्दोलन गर्न बाध्य भएको बताएका छन् । करिब ६ सय नेपाली भिसा सकिएर स्वदेश फिर्तीको पर्खाइमा छन् भने अन्य सप्लाई कम्पनीले लिएको कन्ट्याकमा काम नभएपछि लामो समयदेखि कोठामै बसिरहेका छन् । कम्पनीले कसैलाई काम दिए पनि कम तलबमा काम लगाउने गरेको उनीहरूले बताएका छन् ।
कम्पनीले चार्टर उडान गर्न दूताबाससँग समन्वय गरे पनि दूताबास र कम्पनीबीच तालमेल नमिल्दा पटक–पटक उडान स्थागित हुँदै आएको उनीहरूले बताएका छन् । लामो समयसम्म कोठामा बस्दा धेरै साथीहरू डिप्रेसनको सिकार भएका छन् भने १ महिना अघि मात्र घर फर्कन नपाए एक नेपालीले आत्माहत्यासमेत गरिसकेको उनीहरूले बताएका छन् ।
नेपाली मजदुर एकता समाज साउदीले साउदी अरबमा अलपत्र हजारौँ नेपालीहरूले साउदीमा रहेकोे नेपाली दूताबास र नेपाल सरकारविरुद्ध नाराबाजी गरेको भन्दै दूताबास तथा नेपाल सरकारलगायत सम्बन्धित निकायको गम्भीर ध्यानाकर्षण हुनु जरुरी रहेको बताएको छ ।
नेपाली मजदुर एकता समाजका एक प्रतिनिधिले यसबारे नेपाल नेपाली दूताबास, मेनपावर तथा वैदेशिक रोजगार विभागसम्म यो विषयमा पहल थाल्ने वा जानकारी लिने प्रयास भइरहेको बताएका छन् । यता, यस विषयमा नेपाली दूताबास तथा साउदी अरबमा रहेको एनआरएनएसंग प्रतिक्रिया लिन खोज्दा सम्पर्क हुन सकेन ।
