दोहा– कतारमा आममाफी पाएका, विभिन्न अभियोगमा बन्दी जीवन बिताएका र कतारको डिपोर्टेसन सेन्टरमा रहेका १०६ जना नेपालीलाई डिपोर्ट गरिएको कतारस्थित नेपाली दूताबासका द्वितीय सचिव प्रवीण भट्टराईले जानकारी दिएका छन् । डिपोर्ट गरिएका १०६ जनासहित अन्य विभिन्न समस्यामा परेका नेपाली श्रमिक गरी २४६ जनालाई कतार एयरलाइन्सले काठमाडौं ल्याइदिएको हो ।
उनीहरूलाई विभिन्न समयमा कानुन उल्लघंन गरेर पक्राउ गरी फिर्ती केन्द्रमा राखिएको थियो । कोरोनाको कारण देखाउँदै कतारले आममाफी पाएका तथा बन्दी जीवन बिताएका र फिर्ती केन्द्रमा रहेका नेपालीहरूलाई यहाँभन्दा पहिला पनि डिपोर्ट गरेको थियो ।
यसअघि कतार एयरलाइन्सको पहिलो उडानमार्फत आममाफी पाएका ४३ जनालाई, दोस्रो उडानमार्फत १६१ जनालाई, तेस्रो उडानबाट १४० जना तथा चौँथो उडानबाट ९० जनालाई डिपार्ट गरिसकेको जनाइएको छ ।
कतारबाट पर्सि नेपाल एयरलाइन्सले उडान गर्ने
कोरोना भाइरसका कारण कतारबाट स्वदेश फर्कन विभिन्न माध्यमबाट नेपाली दूताबासमा नाम दर्ता गराएका नेपालीहरूका लागि १० सेप्टेम्बेरमा नेपाल एयरलाइन्सले उडान गर्ने भएको छ ।
दूताबासले उक्त उडानका लागि प्राथमिकतामा परेका ५८७ यात्रुहरूको नामावली पनि सार्वजनिक गरेको छ । स्वदेश फर्किने यात्रुहरूले नेपाल सरकारको निर्णयबमोजिम पिसिआर परीक्षण गरी ७२ घन्टाभित्रको कोभिड–१९ नेगेटिभ सेर्टिफिकेटको सक्कल प्रमाण साथमा राख्नु पर्ने दूताबासले जनाएको छ ।
पिसिआर परीक्षण नगरी जान चाहनेहरूको हकमा आङ्खनै खर्चमा ७ दिनको होटल क्वारेन्टिनमा बस्नु पर्ने र पिसिआर परीक्षण गरेका र नगरेका यात्रुहरू एउटै उडानमा यात्रा गर्न नपाइने व्यवस्था रहेको जनाएको छ ।
होटल क्वारेन्टिनको खर्च टिकट लिने बेलामा लिने र होटललाई भुक्तानी गर्ने कार्य सम्बन्धित एयरलाइन्सले नै गर्नेछ । पिसिआर परीक्षण गर्नका लागि कतारका सरकारी स्वास्थ्य केन्द्र वा कतार सरकारबाट अनुमति प्राप्त प्राइभेट अस्पतालहरूमा सम्पर्क राख्न सकिने दूताबासले जनाएको छ ।
