दोहा– कतार सरकारले आप्रबासी श्रमिकहरूलाई आइडी र भिसा नवीकरणमा सहुलियत दिएको छ । कतार सरकारले पासपोर्टको म्याद नाघेको एक वर्षभित्र कतारी आइडी एक वर्षका लागि नवीकरण गरिदिने र भिजिट भिसा पनि निश्चित अवधिका लागि नवीकरण गर्न सकिने गरी सहुलियत दिएको हो ।
कतारस्थित नेपाली दूताबासका अनुसार कतार सरकारबाट ३१ अगस्ट २०२० मा प्राप्त परिपत्र अनुसार राहदानीको म्याद सकिए तापनि म्याद नाघेको एक वर्षभित्र कतार आइडी एक वर्षका लागि नवीकरण गर्न सकिने र भिजिट भिसा निश्चित अवधिका लागि नवीकरण गर्न सकिने व्यवस्था कतार सरकारले लागू गरेको जानकारी प्राप्त भएको जनाएको छ ।
अब पासापेर्टको म्याद सकिएको एक वर्ष ननाघेका नेपालीहरूले कतारी आइडी र भिसा सजिलै नवीकरण गर्न सक्ने दूताबासले उल्लेख गरेको छ । यो व्यवस्था कतार सरकारले कोरोना महामारी (कोभिड(१९) को कारणले राहदानी जारी तथा नवीकरण गर्न समस्या भएको हुनसक्ने अवस्थामा लागू गरिएको दूताबासले जनाएको छ ।
कतार सरकारको यो निर्णयसँगै पासपोर्टको म्याद सकिएको एक वर्षभित्र कतारी आइडी र भिसा नवीकरण गर्न नसकेका नेपालीलाई फाइदा पुग्ने दूताबासले जनाएको छ ।
पिसिआर परीक्षण निःशुल्क
कतारबाट नेपाल फर्कन अब निःशुल्क र कम शुल्कमा कोरोनाको पिसिआर परीक्षण गर्न सकिने भएको छ । स्वदेश फर्कनका लागि तोकिएका नीजि अस्पतालसँगै अब निश्चित सरकारी अस्पतालमा निःशुल्क र एकदमै कम शुल्कमा कोरोनाको पिसिआर परीक्षण गर्न सकिने दूताबासले जनाएको छ ।
दूताबासका अनुसार वर्कर हेल्थ केयर सेन्टर,फेरिज अब्देल अजिज हेल्थ केयर सेन्टरमा निःशुल्क र कम शुल्कमा परीक्षण गर्न गर्न सकिने । यसैगरी, मुइथेर हेल्थ केयर सेन्टर, रावादत अल खाली हेल्थ केयर सेन्टर, उम सलाल हेल्थ केयर सेन्टर तथा घराफत अल रयान हेल्थ केयर सेन्टर परीक्षण गर्न सकिने दूताबासले जनाएको छ ।
नेपाल सरकारले पिसिआर परीक्षण गरेर स्वदेश फर्किएकालाई होटल क्वरेन्टिनमा बस्न नपर्ने र सिधै होटल क्वारेन्टिनमा जान सकिने जनाएको थियो । यदि पिसिआर परीक्षण नगरी स्वदेश फर्किएमा काठमाडौंमा सात दिन आङ्खनै खर्चमा होटल क्वारेनिटनमा बस्नुपर्ने जनाएको छ ।
