काठमाडौं– कोभिड–१९को महामारी फैलिएपछि बन्द भएको वैदेशिक रोजगारमा जाने कामदारको श्रम स्विकृति अन्तर्राष्ट्रिय उडान सुचारु भएपछि खुल्ने श्रम, रोजगार तथा सामाजिक सुरक्षा मन्त्री रामेश्वर राय यादवले बताएका छन् । आइतबार मन्त्रालयमा श्रमिक सूचना बैंकको उद्घाटन गर्दै मन्त्री यादवले यस्तो बताएका हुन् ।
सरकारले मंगलबार (१६ भदौ) देखि नियमित अन्तर्राष्ट्रिय उडान सुचारु गर्ने जनाएको छ ।
श्रमिक सूचना बैंकले बेरोजगार युवाको विवरण संकलन गर्ने, उनीहरूलाई आवश्यक प्रशिक्षण दिने र रोजगारदाताको आवश्यकताअनुसार काममा लगाउन सहयोग पु¥याउने भर्चुअयल पत्रकार सम्मेलनमा मन्त्री यादवले बताएका छन् । उनले भने, ‘बैंकको स्थापनापश्चात् कृषिलगायत क्षेत्रमा श्रम आर्जन गर्न सक्ने जनशक्तिको पहिचान हुनेछ भने वैदेशिक रोजगारीमा कति रहेका छन् भन्नेबारे एकीकृत जानकारी बैंकले उपलब्ध गराउनेछ ।’
देशभर विभिन्न क्षेत्र, पेसा वा व्यवसायमा संलग्न हुन चाहने वा हाल कार्यरत श्रमिकको विवरण तथा वैदेशिक रोजगारीमा गएका वा फर्किएकाहरूको सीप तथा योग्यताको समेत अद्यावधिक विवरणहरू पनि बैंकले संकलन गर्ने मन्त्री यादवले बताएका छन् ।
उनका अनुसार बैंकमार्फत ७ सय ५३ वटै गाउँपालिकाहरूमा रहेको रोजगार व्यवस्थापन सूचना प्रणालीलाई सुदृढीकरण गरिनेछ । यसका लागि स्थानीय सरकार र प्रदेश सरकारसँग समन्वय गरी अघि बढन् मन्त्री यादवले बताएका छन् ।
आर्थिक वर्ष ०७७÷७८ को वार्षिक बजेटमा श्रमिक सूचना बंैक स्थापना गर्ने भनिए पनि तत्काल उक्त काम सम्पन्न हुन सकेको थिएन । मत्रालयले यसका लागि विज्ञ समूह गठन गर्दै १५ जेठमा मन्त्री यादव समक्ष अध्ययन प्रतिवेदन पेस गरेको थियो ।
प्रतिवेदनमा श्रम बजारमा प्रवेश गर्ने श्रम शक्तिको योग्यता, ज्ञान, सीप, दक्षता तथा अनुभवको लेखांकन गरी कुन क्षेत्रमा रोजगार वा स्वरोजगारमा रहेका छन् भन्ने अत्यावश्यक विवरण सूचना प्रविधिमा आवद्ध गरी श्रमिक र रोजगारीको क्षेत्र सम्बधी विस्तृत सूचना रहने श्रमिक (सूचना) बैंक स्थापना गर्नु उपयुक्त हुने सिफारिस गरेको थियो ।
यससँगै आइतबार मन्त्री यादवले बैंकको औपचारीक उद्घाटन गरेका छन् । साथै, अब बेरोजगारहरूले श्रमिक सूचना बैंकको अनलाइनमा गएर रोजगारका लागि फाराम भर्न सक्नेछन् । फाराम भर्दा रोजगारदाताले राखेका विज्ञापन हेरेर बेरोजगारहरूले आवेदन दिन सक्ने व्यवस्था गरिएको बताइएको छ ।
